सिमरा (हाम्रो खेलकुद) – वडा नम्बर २ जीतपुरसिमरा उपमहानगर स्तरीय प्रथम मेयर कप फुटबल प्रतियोगिताको सेमिफाइनलमा प्रवेश गरकोे छ । सिमरा रंगशालामा बिहिबार भएको दोस्रो क्वार्टरफाइनल खेलमा वडा नं. २१ लाई पराजित गर्दै २ नं वडा अन्तिम चारमा प्रवेश गरेको हो । वडा नं. २ को जीतमा विवश गुरुङले निर्णायक गोल गरे । 

पहिलो खेलमा वडा नं. १८ लाई पराजित गर्दै क्वार्टरफाईनलमा प्रवेश गरेको वडा नं. २ ले दोस्रा जित हात पार्ने क्रममा उत्कृष्ट प्रदर्शन ग¥यो । वडा नं. १५ लाई पराजित गरेर अन्तिम आठमा स्थान बनाएको वडा नं. २१ ले खेलमा बनाएको अवसर सदुपयोग गर्न नसक्दा पराजित हुन पुग्यो ।

खेलको सुरुवात देखी दुवै टिमले आक्रामक प्रदर्शन गर्दै अवसरको सिर्जना गरेपनि सदुपयोग गर्न चुकेका थिए । खेलको २६ औं मिनेटमा वडा नं. २ का विवशको प्रहार वडा नं. २१ का गोलरक्षकले नियन्त्रणमा लिन सकेनन् । विवशको प्रहार आकर्षक नभएपनि गोलरक्षकको कमजोरीका कारण बलले जाली चुम्न पुगेको थियो ।

गोलरक्षकको कमजोरीको फाइदा उठाएको वडा नं. २ का लागि विवशको गोल नै निर्णायक बन्न पुग्यो । खेलको दोस्रो हाफमा वडा नं. २१ को थुप्रै प्रहार वडा नं. २ का गोलरक्षक सुजन श्रेष्ठले असफल तुल्याएका थिए । सुजन खेलको म्यान अफ दि म्याच घोषित भए । उनलाई वडा नं. २ का अध्यक्ष तिलक श्रेष्ठ र वडा नं. २१ का अध्यक्ष कृष्ण ठकुरीले ट्रफि वितरण गरेका थिए ।

प्रतियोगिता अन्तर्गत शुक्रबार नं. २२ र वडा नं. ७ बीच खेल हुनेछ । जीतपुरसिमरा उपमहानगरपालिकाको सहयोगमा सामुदायिक बिकासशील क्लबले आयोजना गरेको प्रतियोगिताको विजेताले ५० हजार र उपविजेताले २५ हजार प्राप्त गर्नेछ ।