बट्टार (हाम्रो खेलकुद)– विभागीय नेपाल पुलिस क्लब नुवाकोटमा जारी विशाल सिमेन्ट प्रथम नुवाकोट गोल्डकप फुटवल प्रतियोगिताको उपाधि नजिक पुगेको छ । बट्टारस्थित खेल मैदानमा बिहिबार भएको खेलमा पोखरा–११ लाई टाइब्रेकरमा ३–२ ले पराजित गर्दै पुलिस प्रतियोगताको फाइनलमा पुगेको हो ।

पुलिसले उपाधिको लागि यो सिजन दुई उपाधि जितिसकेको ललितपुरको रुस्लान थ्री स्टारसँग शनिबार प्रतिस्पर्धा गर्नेछ । थ्री स्टार बुधबार घरेलु टोली नुवाकोट–११ लाई ४–१ को फराकिलो अन्तरले पराजित गरेर अन्तिम दुईमा पुगेको थियो ।

निर्धारित समयको खेल गोलरहित बराबरीमा सकिएपछि खेलको निर्णय पेनाल्टी सुटआउटबाट भएको थियो । जसमा पुलिसले ले बाजी मा¥यो । पेनाल्टी सुटआउटमा पुलिसका सुमन लामा, अभिषेक रिजाल र तेज तामाङले गोल गरे । अजित भण्डारी र भोला सिलवालको प्रहार पोखराका गोलरक्षक राजाबावु थापाले रोकेकका थिए ।

पोखराका अजित गुरुङ र विश्व अधिकारी गोल गरे । तर, हुदा बिमल बस्नेत, हेमन गुरुङ र लक्ष्मण रुचालको प्रहार वाहिरिएको थियो । पुलिस अभिषेक रिजाल म्यान अफ दि म्याच घोषित भए । उनलाई साकुरा नेपालले नगद १० हजार रुपैयाँ प्रदान गर्यो ।

जिल्ला खेलकुद विकास समिति नुवाकोट र नुवाकोट फुटवल संघले संयुक्त रुपमा आयोजना गरेको प्रतियोगिताको विजेताले ५ लाख र दोस्रो हुने टोलीले ३ लाख रुपैयाँ प्राप्त गर्नेछ । प्रतियोगितामा १० टोलीको सहभागिता रहेको छ ।