काठमाडौं (हाम्रो खेलकुद) – विश्व खेलकुदको सबैभन्दा लोकप्रिय प्रतियोगिता, फुटबलको महाकुम्भ विश्वकप २०१८ जुन १४ देखि रुसमा सुरु हुंदैछ । हाम्रो खेलकुद डटमकको ‘विश्वकपमा हेर्नलायक २० खेलाडी’ को सुचीको नम्बर ८ मा रहेका छन् फ्रान्सका फरवार्ड किलियन बाप्पे ।

दुई वर्ष अगाडीसम्म किलियन बाप्पे विश्व फुटबल नसुनिएको नाम थियो । तर दुई वर्षमा १९ वर्षे किलियन बाप्पे संसारकै उत्कृष्ट खेलाडीको रुपमा उदाएका छन् ।

आफ्ना गतिका लागि चिनिने बाप्पे विपक्षी रक्षकलाई छक्याउन माहिर छन् । आर्सनलका प्रशिक्षक आर्सन वेंगरले उनलाई पूर्व स्टार थिएरी हेनरीसँग पनि तुलना गरेका छन् ।

यस भन्दा अघिल्लो सिजन उनले मोनाकोका लागि ४४ खेलमा २६ गोल गरेका थिए । उनको प्रदर्शनको मद्दतले मोनाकोले १७ वर्षमा पहिलो पटक लिगको उपाधि जित्यो भने टोलीले च्याम्पियन्स लिगमा सेमिफाइनल सम्मको यात्रा तय गरेको थियो ।

अघिल्लो सिजन पिएसजीबाट खेल्दा उनको खेल अझै परिपक्व देखियो । सबै प्रतियोगितामा १७ गोल र ११ असिस्ट गर्दै पिएसजीलाई उपाधि पनि जिताउन सफल भएका बाप्पेलाई अब नयां चुनौति रहेको छ – फ्रान्सलाई २० वर्षमा पहिलोपटक विश्वकप जिताउने ।

यही वर्षदेखि फ्रान्सको टोलीमा खेल्न सुरु गरेका बाप्पेको सुरुवाती ११ मा स्थान पक्का नै रहेको छ । उनले अग्रपंक्तिको दायाँ विङ सम्हाल्ने छन् र एन्टोइन ग्रिजम्यान र ओलिभर जिरुडजस्ता अनुभवी नामहरुलाई साथ दिने छन् ।

फ्रान्स यस पटक बलियो दाबेदारको रुपमा पनि हेरिएको छ । फ्रान्ससँगै ब्राजिल, जर्मनी, स्पेन र अर्जेन्टिना उपाधियोग्य राष्ट्रका रुपमा हेरिएका छन् । युवा बाप्पे लयमा छन् र आफुलाई फुटबलमा अर्को ठुलो नामको रुपमा स्थापित गर्ने हो भने यो विश्वकपभन्दा ठूलो मौका बाप्पेलाई आउने छैन ।