रियो दि जेनेरियो (एजेन्सी)– पाँच पटकको विश्व कप विजेता ब्राजिल यस पटक पनि बलियो दाबेदार मध्ये एक मानिन्छ । तर, सोही देशका महान खेलाडी पेलेले भने टोली प्रति पूर्ण रुपमा विश्वास गर्न सकेनन् । टोलीबाट प्रभावित हुन नसकेको उल्लेख गर्दै उनले भनेका छन्,‘ हामीसँग अहिले पनि सहि टोली छैन ।’

यपद्दी टिटेले प्रशिक्षण सम्हालेयता टोलीले उच्च प्रदर्शन गर्दै आएको छ । झन्डै दुई वर्षको अवधिमा खेलिएका २० मध्ये टोलीले एउटा खेल मात्र हारेको छ । टिटेसँग पेले पनि प्रभावित छन् । तर, उनको भनाई कुनै एउटा व्यक्तिले मात्र नभई पुरा टोलीले विश्व कप जिताउने भएकाले त्यसबाट बढी केन्द्रित हुनु पर्ने बताउँछन् ।

‘टिटेको क्षमतामा मलाई पुरा विश्वास छ । तर, विश्व कप सुरु हुन अब केहि दिन मात्र बाँकी छ । यस्तोमा हामीसँग सहि टोली छैन,’ पेलेले भने‘ मेरो चिन्ता त्यसमा हो । व्यक्तिगत रुपमा सबै क्षमतावान खेलाडी छन् । तर एउटा टोलीका रुपमा हामी पूर्ण छैनौं ।’

क्लब फुटबलका दौरान खुट्टामा चोट लागेपछि नेयमारका विषयमा समर्थकहरु निकै चिन्तित थिए । तर, हालै क्रोएसियाविरुद्धको खेलमार्फत पुनरागमन गर्ने क्रममा नेयमारले गोल गरेपछि शुभचिन्तकहरु उत्साहित भएका छन् ।

तीन पटकको विश्व कप विजेता पेलले नेयमारलाई विश्व कप जित्ने क्षमतावान खेलाडीको संज्ञा दिएपनि व्यक्तिगत क्षमताका आधारमा नभै टोली राम्रो भएर हुनु पर्ने बताए ।

‘मेरा लागि नेयमार विश्वका उत्कृष्ट खेलाडी मध्ये एक हुन् । अहिले उनी पहिला भन्दा पनि परिपक्व र अनुभवी भएका छन्, उनले थपे,‘ तर विश्व कप व्यक्तिगत क्षमता प्रदर्शनका लागि मात्र होइन । विश्व कप टिमले जित्ने हो । ’

पेलेले आफ्नो समयमा ब्राजिल सफल यसै नभएको उदाहरण पेश गरे । सन् १९७० को ब्राजिलियन टोलीले अहिले सम्मकै उत्कृष्ट मानिन्छ । तत्कालिन टोलीका सदस्य टासाटो, रिभेलिनो, ग्रेसन र पेले त्यति बेला आ आ आफ्नो क्लबमा १० नम्बर जर्सी लगाउथे ।

पेलेले भने,‘ त्यो विश्व कपका लागि हामीले ६ महिना भन्दा बढी समय सँगै विताएका थियो । त्यसैले सफलता प्राप्त गर्न सकेका थियौं । ‘यसपटकको विश्व कपमा ब्राजिल समूह इ स्विट्जरल्यान्ड, कोस्टा रिका र सर्बियासँग छ । ब्राजिलले जुन १७ मा पहिलो खेल खेल्नेछ ।