काठमाडौं (हाम्रो खेलकुद) – विश्व खेलकुदको सबैभन्दा चर्चित प्रतियोगिता, विश्वकप २०१८ जुन १४ देखि रुसमा सुरु हुँदै छ । हाम्रो खेलकुद डटकमको ‘विश्वकपमा हेर्नलायक २० खेलाडी’ को सुचीको नम्बर ८ मा रहेका छन् उरुग्वेका स्ट्राइकर लुइस स्वारेज ।

पछिल्लो विश्वकपमा २ गोल र २ असिस्ट गरे पनि लुइस स्वारेज जर्जियो केलिनीलाई टोकेको कारण कुख्यात बनेका थिए । सो घटनापछि उनलाई ४ महिनाका लागि प्रतिबन्ध पनि गरिएको थियो ।

२०१० को विश्वकपमा डियगो फोर्लानको उत्कृष्ट प्रदर्शनमा उरुग्वे सेमिफाइनलसम्म पुगेको थियो । क्वाटरफाइनलमा स्वारेजले घानाको गोल हातले बचाउंदै मैदान बाहिरिएका थिए । यस विश्वकपमा स्वारेजलाई आफ्नो छवि सुधार्ने मौका हुने छ ।

२०१३/१४ सिजनमा लिभरपुलबाट ३१ गोल गर्दै रेकर्ड राखेका प्रतिबन्धित भएबावजुद बार्सिलोनाले किनेको थियो । सो सिजन उनले बार्सिलोनाका लागि २३ गोल गरे । २०१५/१६ सिजन स्वारेजका लागि अति आकर्षक रह्यो । सबै प्रतियोगितामा उनले ४८ गोल गरे । त्यसपछिको सिजनमा ३२ गरेका स्वारेजले भर्खरै समाप्त सिजनमा २६ गोल गरे ।

स्वारेज आफ्नो गोल गर्ने कला र बलियो प्रहारका लागि चिनिन्छन् । डिफेन्डरहरुलाई छल्लाउन माहिर स्वारेज गोल गर्ने अवसरहरु पनि सिर्जना गर्न उत्तिकै निपूण रहेका छन् ।

यस विश्वकपमा उरुग्वे समूह ‘ए’मा आयोजक रुस, इजिप्ट र साउदी अरेबियासँग रहेको छ । यस समूहमा उरुग्वे निकै बलियो देखिएको छ र लयमा रहेका स्वारेजलाई चम्किने मौका पनि रहेको छ । बलियो डिफेन्स पनि रहेकाले उरुग्वे २०१० जस्तै उत्कृष्ट प्रदर्शन गर्न तथा दाबेदार मानिएका टोलीहरुलाई निराश पार्न पनि सक्षम छ । तर, सो अभियानमा स्वेरजको भूमिका निकै महत्त्वपूर्ण हुने छ ।