म्याड्रिड (एजेन्सी) – स्पेनिस टोलीका भरपर्दा मिडफिल्डर आन्द्रेस इनिएस्टालाई स्पेनको रोयल अर्डर अफ मेरिटले सम्मान गरिएको छ । मंगलबार राष्ट्रिय टोलीको प्रशिक्षण दौरान स्पेनका प्रधानमन्त्री पेड्रो सान्चेजले अभ्यास स्थलमै गएर इनिएस्टालाई अवार्ड प्रदान गरे ।

स्पेनिस टोली अर्को साताबाट सुरु हुने विश्वकपको तयारीमा जुटेको छ । विश्वकप अगाडी स्पेनले शनिबार ट्युनिसियाविरुद्ध मैत्रीपूर्ण खेल पनि खेल्दैछ । उक्त खेलअघि प्रशिक्षण गरिरहेको अवस्थामा प्रधानमन्त्री सान्चेजले इनिएस्टालाई सम्मान गरेका थिए । भर्खरै बार्सिलोना छाडेर जापानको भिसेल कोबेसँग सम्झौता गरेका इनिएस्टाको यो अन्तिम विश्वकप हो । उनले विश्वकप पछि राष्ट्रिय टोलीबाट विश्राम लिने बताएका छन् ।

सन् २०१० को विश्वकप फाइनलमा स्पेनलाई उपाधि दिलाउन निर्णायक गोल गरेका इनिएस्टा स्पेनका सर्वकालीन महान खेलाडीको सुचिमा पर्छन् । उनले राष्ट्रिय टोलीको दोहोरो युरो उपाधिमा पनि महत्त्वपूर्ण भूमिका निर्वाह गरेका थिए । यसबाहेक स्पेनको घरेलु फुटबलमा पनि इनिएस्टाले आफ्नो छुट्टै परिचय स्थापित गरेका छन् । २२ वर्षदेखि बार्सिलोनाबाट निरन्तर खेल्दै आएका उनले फुटबल करियरमा टोलीका लागि जित्न बाँकी रहेको उपाधि छैन ।