म्याड्रिड (एजेन्सी)– रियल म्याड्रिडका अध्यक्ष फ्लोरेन्टिनो पेरेजसँग खेलाडी लिने विषयमा विवाद परेपछि जिनेदिन जिदानले प्रशिक्षक पद त्यागेको खुुलासा भएको छ । च्याम्पियन्स लिग उपाधिमा ह्याट्रिक गरेको केहि दिनमा जिदानले रियल छाड्ने घोषणा गरेका थिए ।

बिहीबार अप्रत्यासित रुपमा पत्रकार सम्मेलन गर्दै फ्रेन्सेली जिदानले साढे दुई वर्षको रियलको प्रशिक्षण यात्राको अन्त्य गरेका थिए । क्लबका महान खेलाडी एवं प्रशिक्षक ४५ वर्षे जिदानले पद छाड्न यो सहि समय भएको बताएका थिए ।

द सनका अनुसार बुधबार राती जिदान र अध्यक्ष पेरज नयाँ सिजनमा कुन खेलाडी लिने भन्नेमा आ आफ्नो तर्क राख्दा विवाद भएको थियो । जिदान चेल्सीका स्टार इडन हाजार्ड लिन चाहन्थे भने पेरेजको चाहना म्यानचेस्टर युनाइटेडका गोलपिकर डेभिड डि जिया भित्राउने थियो । जिदान हालका गोलकिपर केलोर नाभाससँग खुसी थिए भने पेरेज उनीसँग सहमत थिएनन् ।

सहमति हुन नसकेपछि जिदानले मैले आफ्नो काम गरे, तिम्रो टोली तिमि सम्हाल भनेको बताइएको छ । आर्सनलका पूर्व प्रशिक्षक आर्सन वेङ्गर, टोटेनह्यामका माउरिसियो पोचिन्टिन्हो र रियलका पूर्व मिडफिल्डर गुटी अहिले रियलको नयाँ प्रशिक्षकको दौडमा रहेको बताइएको छ ।

पेरजसँगै पत्रकार सम्मेलनमा जिदानले भनेका थिए, अर्को सिजनलाई निरन्तरता नदिने मैले निर्णय लिएको छु । मेरो र बाँकी अन्यका लागि पनि यो परिवर्तनको सहि समय भएको मलाई लाग्यो । यो निर्णय लिन सहज थिएन ।