म्याड्रिड (एजेन्सी)– क्रिस्टियानो रोनाल्डो रियल म्याड्रिड छोड्ने संकेत गरेपछि फुटबल जगतमा तरंग पैदा भएको थियो । विश्व कप सुरु हुन अब केहि दिन मात्र बाँकी रहँदा पनि रोनाल्डोले रियल छोड्ला वा अर्को सिजन पनि सोही क्लबमा निरन्तर रहलान भन्ने चर्चा चलिरहेको छ ।

रियलकै पूर्व स्ट्राइकर जुलियो बापिस्टा भने रोनाल्डोले क्लबबाट अझै धेरै सपना पुरा गर्ने विश्वास व्यक्त गरेका छन् । मे २६ मा लिभरपुलविरुद्ध च्याम्पियन्स लिग फाइनलमा रियलले ३–१ को जित हासिल गर्दा रोनाल्डो भने केहि छायाँमा परेका थिए ।

लगातार तेस्रो पटक रियलले च्याम्पियन्स लिग उपाधि जिते लगत्तै रोनाल्डोले अर्को सिजन आफु क्लबमा रहन नसक्ने संकेत गरेका थिए ।यद्दपी उनको भविष्यका बारेमा प्रष्ट भइसकेको भने छैन । ३३ वर्षे रोनाल्डोले नौ सिजन रियलमा विताउँदा सबै खाले उपलब्धी हासिल गरिसकेका छन् ।

बापिस्टा भने नयाँ चुनौतिका लागि रोनाल्डो तयार हुनु पर्ने बताएका छन् । ‘रोनाल्डोसँग अझै पनि रियलका लागि थप उपलब्धी दिलाउने सपना छ । यद्दपी उनले सबै खाले उपलब्धी जितिसकेका छन्,’ उनले भने,‘ अन्तिम निर्णय गर्नुअघि सम्म उनले धर्यता राख्नु पर्दछ । सिजन सुरु हुँदा सम्म त्यो धर्यता जरुरी हुन्छ । त्यति बेला के हुन्छ हामी भन्न सक्दैनौं । ‘

पछिल्लो नौ वर्षमा रोनाल्डो सम्मिलित रियलले ४ वटा च्याम्पियन्स लिग र २ वटा ला लिगा उपाधि जितेको थियो । यहि बीचमा उनले पाँच वटा बालोन डी ओर जित्ने लियोन मेस्सीको कीर्तिमानीलाई बराबरी गरेका छन् । क्लब छाड्न संकेत गरेसँगै उनी पूर्व क्लब म्यानचेस्टर युनाइटेड वा पेरिस सेन्ट जर्मेन जान सक्ने अनुमान गरेका छन् ।

रोनाल्डोले रियल छाड्ने चर्चा अबको केहि दिनमा विश्व कपका कारण छायाँमा पर्न सक्दछ । किन की रोनाल्डो आफै पनि विश्व कपमा केन्द्रित हुनेछन् । उनको कप्तानमा दुई वर्षअघि पोर्चुगलले युरो कप जितेको थियो । त्यो पोर्चुगलले जितेको अहिले सम्मको ठूलो उपाधि हो । अब रोनाल्डो र उनका सहकर्मी विश्व कपमा उच्च प्रदर्शनका लागि केन्द्रित हुनेछन् ।