लन्डन (एजेन्सी)– सफल पुनरागमन गर्ने क्रममा क्रोएसियाविरुद्धको मैत्रीपूर्ण खेलमा गोल गरेका नेयमार लन्डनमा विलियन सह मालिक रहेको रेष्टुरेन्टमा खाना खानका लागि अन्य ब्राजिलियन सहकर्मीका साथ पुगेका छन् ।

दोस्रो हाफमा मैदान प्रवेश गरेका नेयमारले गोल गरेको खेलमा ब्राजिलले क्रोएसियालाई २–० ले हराएको थियो । ९८ दिन पछि मैदान फर्केका नेयमारले ६९ औं मिनेटमा टोलीका लागि गोल गरेका थिए । उनी अन्य सहकर्मीका साथ सोमबार विलियन, डेभिड लुइज र उनीहरुका एजेन्ट किया जुराबेचिनको संयुक्त लगानीमा रहेको बाबो रेष्टुरेन्ट पुगेका थिए ।

पेरिस सेन्ट जर्मेन (पिएसजी) का स्ट्राइकर नेयमारले रेष्टुरेन्ट अगाडि विलियन र उनको अनुपस्थितिमा ब्राजिलको अग्रपक्तिको मोर्चा सम्हालेका म्यानचेस्टर सिटीका गाब्रियल जिसससँगको फोटो खिचाएका थिए । नेयमारसँगै पिएसजीका थिएगोल सिल्भा, ब्राजिलका तेस्रो रोजाइका गोलकिपर कासियो, साख्तार डोनेक्सका फागनेर, रक्षक मिरान्डा र पेड्रो गेरोमेल पनि रेष्टुरेन्ट गएका थिए ।

आइतबारको जितपछि नेयमारले दायाँ खुट्टाको फोटो इन्स्टाग्राममा पोष्ट गरेका थिए । नेयमारले लेखे, “शुभ सन्ध्या । लड्ने अठोट लिएको छु, हारे पनि गर्वसँग गर्ने छु । किनकी यो संसारनै हिम्मतवालाहरुको हो ।” फेब्रुअरी २५ मा मार्सेलसँगको खेलका दौरान उनको त्यो खुट्टामा चोट लागेको थियो । ब्राजिलले विश्व कपको अन्तिम मैत्रीपूर्ण खेल आइतबार भियनामा अस्ट्रियासँग खेल्नेछ ।

अस्ट्रिया विश्व कपमा छनोट हुन असफल भएपछि शनिबार भएको मैत्रीपूर्ण खेलमा साविक विजेता जर्मनीलाई २–१ ले हराएको थियो । पाँच पटकको विश्व कप विजेता ब्राजिल समूह ‘इ’मा आयोजक स्विट्जरल्यान्ड, क्रोएसिया र सर्बियासँग रहेको छ । ब्राजिलले पहिलो खेल स्विट्रल्यान्डसँग जुन १७ मा खेल्नेछ ।