एभर्टन (एजेन्सी)– वायन रुनी एमएलएसको डिसी युनाइटेडसँग सम्झौताको नजिक रहेको अवस्थामा एभर्टनका नयाँ प्रशिक्षक मार्को सिल्भाले अझै उनी क्लबमा रहने सक्ने सम्भावना रहेको बताएका छन् । १६ वर्षे प्रिमियर लिगको करियर अन्त्य गर्दै ३२ वर्षे रुनी वासिङ्टन टोलीमा जाने तयारीमा छन् । २ वर्षका लागि वर्षको ३.८ मिलियन पाउन्डमा उनी सम्झौताको निकट रहेको बताइएको छ ।

गत साता एभर्टनको प्रशिक्षक नियुक्त भएका सिल्भाले सरुवा पक्का हुनुअघि रुनीसँग कुरा गर्ने बताएका छन् । यद्दपी उनले यो विषयमा अन्तिम निर्णय इङ्ल्यान्डका पूर्व कप्तानले लिने बताए । एभर्टन आएयताको पहिलो पत्रकार सम्मेलनमा पोर्चुगिज सिल्भाले रुनीसँग छलफल गर्ने बताएका हुन् ।

‘रुनी क्लबका माहान खेलाडी हुन् । हामीले सबै विषय बुझ्न जरुरी छ । क्लबको ढोका उनका लागि सधै खुल्ला छ,’ उनले भने, म उनीसँग कुरा गर्नेछु । सबै चिज समयमा हुनेछ । यसमा उनको निर्णय महत्वपूर्ण हुन्छ ।’

नयाँ परिस्थितिले रुनीलाई गुडिसन पार्कमा रहन मद्दत पुग्ने विश्वास पनि गरिएको छ । क्लबका फुटबल निर्देशक मार्सेल ब्रान्ड्सले भने, उनले क्लब छाड्ने सम्भावना छ । उनी अमेरिकी क्लबसँग छलफलमा छन् । यो कसैसँग लुकेको विषय होइन । ब्रान्ड्सले आफुहरुले पनि रुनीसँग कुरा गरिरहेको बताएका छन् ।