म्याड्रिड (एजेन्सी) – फिफा विश्वकप २०१८ को तयारीमा रहेको स्पेन मैत्रीपूर्ण खेलमा स्विटजरल्यान्डसँग १-१ को बराबरीमा रोकिएको छ । स्पेनले पहिलो हाफमा अग्रता लिएपनि स्विस टोलीले दोस्रो हाफमा गोल फर्काएको थियो ।

पहिलो हाफको २९ औं मिनेटमा डेविड सिल्भाको पासको सदुपयोग गर्दै अल्भारो ओड्रीओजोलाले स्पेनलाई अग्रता दिलाएका थिए । अल्भारोले पेनाल्टी क्षेत्र बाहिरबाट गरेको प्रहार गोलमा परिणत भएको थियो । दोस्रो हाफको ६२ औं मिनेटमा रिकार्डो रोड्रीग्वेजले गोल गर्दै खेललाई १-१ को बराबरीमा ल्याए । दुवै टोलीले यस खेलमा आफ्नो पहिलो रोजाईको टोली उतारेका थिए ।

स्पेनले अधिकांश समय स्विस टोलीलाई दवावमा राखेपनि थप गोल भने गर्न सकेन । स्पेनका गोलरक्षक डेविड डे हेयाले पनि केहि राम्रो बचाउ गरे । स्पेनका प्रशिक्षक जुलेन लोपेटेगुईले जेरार्ड पिके र सेजार एज्पिलिक्वेटालाई डिफेन्सको मध्य भागमा खेलाएका थिए । सर्जियो रामोस च्याम्पियन्स लिग फाइनल खेलेर विश्राममा रहेका कारण प्रशिक्षक जुलेनले नयाँ रणनीति अपनाएका थिए ।

मिडफिल्डमा कोके र थियागो खेल्दा आक्रामक मिडफिल्डमा इआगो आस्पास, आन्द्रेश इनिएस्टा र डेविड सिल्भा उपस्थित थिए । आक्रमणको जिम्मेवारी डिएगो कोस्टाले सम्हाले । अन्तिम ३०० मिनेटका लागि भने कोस्टाको स्थानमा रोड्रीगो र सिल्भाको स्थानमा मारको एसेन्सियोलाई जिम्मेवारी दिइएको थियो ।

स्पेनले विश्वकपको समूह ‘बी’ मा पोर्चुगल, मोरोक्को र इरान सामना गर्नेछ । स्विस टोलीले भने समूह ‘ई’ मा रहेका सर्बिया, कोस्टा रिका र ब्राजिलसँग खेल्नेछ ।