म्युनिख (एजेन्सी) – जर्मन राष्ट्रिय फुटबल टोलीका प्रशिक्षक जोचिम लोले शनिवार अष्ट्रियाविरुद्धको २-१ को हारबाट आफू निराश भएको बताएका छन् । उनले विश्वकप सुरु हुनुअघि टोलीले धेरै काम गर्नुपर्ने समेत बताएका छन् ।

विश्वकपको साविक विजता जर्मनी सन् १९८७-८८ यता पहिलो पटक लगातार ५ खेलमा हार बेहोर्न पुगेको छ । यसका साथै जर्मनीले सन् १९८६ यता पहिलो पटक अष्ट्रियाविरुद्ध हार बेहोर्नुले पनि टोलीमा थप निराशा छाएको हो । लोले भने, ‘यो हारले मलाई दुखित बनाएको छ । हामीले बनाएका धेरै योजना कार्यान्वयन गर्न सकेनौं । गोल गर्नसक्ने समयमा धेरै पटक बल गुमाउन पुग्यौं । हामी आफुलाई मुर्ख बनाउन चाहदैनौं भने आउने दुई हप्तामा हामीले धेरै काम गर्नुछ ।’

विश्वकप अन्तर्गत जुन १७ मा मस्कोमा मेक्सिकोको सामना गर्नुअघि जर्मनीले साउदी अरबियासंग अर्को मैत्रीपूर्ण खेल खेल्नेछ । ‘ शनिबार आफ्नै गल्तिको कारण पराजित भयौं । हामीले सुरुवाती अग्रता लिएपछि खेलमा पकडमा बनाएपनि ब्रेक अगाडी र ब्रेकपछीको १५-२० मिनेट हामीले लय गुमायौं । हामीले अपत्यारिलो ढंगले बल गुमाउन पुग्यौं र खेलमा धेरै पोसेसन गुमायौं । हाम्रो टोलीबाट यस्तो नतिजाको आशा राख्दैनौं । हाम्रै गल्तीका कारण विपक्षीले खेलमा फर्कने मौका पाए,’ प्रशिक्षक लोले सुनाए ।

गत सेप्टेम्बरमा खुट्टा भाँचिएपछि घाइते बनेका म्यानुएल नोएरले अष्ट्रियाविरुद्ध खेलमा  पुनरागमन गरे । सो विषयमा बोल्दै लोले भने, “नोएरको विषयलाई हेर्ने हो भने उनले सोचेभन्दा राम्रो पुनरागमन गरेका छन् । खेलपछि पनि उनको खुट्टामा केहि समस्या देखिएन र त्यो नै महत्वपूर्ण पक्ष हो,’ उनले थपे, ‘ उनले धेरै अवस्थामा राम्रो र छिटो प्रतिक्रिया देखाए । उनले चोटबाट पुनरागमन गरिरहेका भन्ने थाहा पाउन कठिन थियो । उनले २-३ वटा राम्रा बचाउ गरे । म उनीसँग अझै विस्तृत कुराकानी गर्नेछु । उनलाई खेल र यो हप्ताको प्रशिक्षण दुबैमा केहि समस्या थिएन । ‘