लन्डन (एजेन्सी)– ब्राजिलियन स्टार फिलिप काउटिन्होको नजरमा यो विश्वकपमा क्रिस्टियानो रोनाल्डो र लियोनल मेस्सीबाहेक अन्य खेलाडी चम्कने विश्वास लिएका छन् । उनले यो विश्वकप अन्य खेलाडीका लागि आफुलाई प्रमाणित गर्ने अवसरका रुपमा पनि लिएका छन् ।

मेस्सी र रोनाल्डो दुवै आ आफ्नो राष्ट्रलाई प्रतिनिधित्व गर्दै रसिया जाने तयारीमा छन् । रोनाल्डो पोर्चुगल र मेस्सी अर्जेन्टिनाका कप्तान हुन् । काउटिन्होले पूर्व सहकर्मी र ब्राजिलियन स्टारमाथि यसपटक बढी भरोसा गरेका छन् ।

‘मलाई लाग्छ विश्वकपको मौका उठाउने यो अन्य खेलाडीका लागि राम्रो अवसर हो,’ काउटिन्होले भने,‘ मेस्सी र रोनाल्डो लामो समयदेखि उच्च प्रदर्शन गर्दै आएका छन् । तर मलाई लाग्छ यो पटक अन्य खेलाडीले आफुलाई प्रमाणित गर्ने आशा गरेको छु ।’

उनले लिभरपुलका पूर्व सहकर्मी इजिप्सियन मोहम्मद सालाह र आफ्नो टोलीका नेयमारप्रति बढी आशा गरेका छन् । ‘सालाह र नेयमारले यो पटक राम्रो गर्न सम्भावना छ । यद्दपी प्रतियोगिता कसरी अघि बढ्छ त्यसमा धेरै निर्भर गर्छ,’ उनले भने,‘ उनीहरु क्षमतावान खेलाडी हुन् । त्यसैले यसपटक मैले उनीहरुबाट बढी अपेक्षा राखेको छु ।’

नेयमारबाट काउटिन्होले मात्र होइन ब्राजिलियन जनताले पनि त्यतिकै आशा गरेका छन् । यसअघि घरेलु मैदानमा भएको विश्व कप ब्राजिलका लागि विर्सन लायक रहेको थियो । नेयमारलाई चोट समेत लागेको त्यो विश्व कपको सेमिफाइनलमा ब्राजिल जर्मनीसँग ७–१ ले पराजित भएको थियो ।

छनोट चरणमा शीर्षस्थानमा रहँदै विश्व कपमा स्थान पक्का गरको ब्राजिलले यसपटक समूहमा सर्बिया, कोस्टा रिका र स्विट्जरल्यान्डको सामना गर्नेछ ।