लन्डन (एजेन्सी) – ब्राजिलले विश्वकप अगाडिको मैत्रीपूर्ण खेलमा आइतबार क्रोएसियाको सामना गर्दैछ । लिभरपुलको घरेलु मैदान एनफिल्डमा हुने खेलका लागि ब्राजिलका प्रशिक्षक टिटेले आफ्नो सुरुआती रोजाई घोषणा गरिसकेका छन् ।

प्रशिक्षक टिटेले चोटबाट पुनरागमन गर्ने प्रयासमा रहेका स्टार फरवार्ड नेयमारले दोस्रो हाफमा खेल्ने बताएका छन् । उनले सुरुआती रोजाइमा भने फिलिप कोउटिन्हो र ग्याब्रिएल जेससलाई आक्रमणको जिम्मेवारी सुम्पिएका छन् । कोउटिन्होले लिभरपुलबाट बार्सिलोना गएपछि पहिलोपटक एनफिल्ड मैदानमा खेल्दै छन् । यी दुईलाई चेल्सीका विंगर विलियनले साथ दिनेछन् ।

मिडफिल्डमा रियल म्याड्रिडका क्यसेमिरो, पौलिन्हो र फर्नान्डीन्हो रहने छन् । क्यासेमिरोले रक्षात्मक भूमिका निर्वाह गर्नेछन् भने अन्य दुई खेलाडीले आक्रामक रणनीतिमा बढी ध्यान दिनेछन् । डिफेन्समा थिआगो सिल्भा र मिरान्डाले मुख्य डिफेन्सको जिम्मेवारी सम्हाल्नेछन् । साइड डिफेन्समा भने ड्यानिलो र मार्सेलो रहनेछन् । ड्यानी आल्भेसले विश्वकप गुमाउने पक्का भएपछि म्यानचेस्टर सिटीका ड्यानिलोले मौका पाएका हुन् । गोलरक्षकको भूमिका एएस रोमाबाट खेल्दै आएका एलिसनले पाएका छन् ।

टिटेले हालको अवस्थामा ब्राजिलको सबैभन्दा बलियो टोली यहि नै रहेको पनि जनाए । उनले सबै खेलाडीको फिटनेस र खेल क्षमता हेरेर यो टोली छनोट गरेको स्पष्ट पारे । यद्यपी विश्वकप अगाडीका अभ्यास खेलको प्रदर्शन हेरेर टोलीमा परिवर्तन गर्ने सम्भावना पनि उत्तिकै छ । आइतबारको खेलका लागि फरवार्ड ग्यब्रिएल जेससले कप्तानी सम्हाल्नेछन् । प्रशिक्षक टिटेले टोलीको कप्तान कोहि एक खेलाडी नभएर फरक फरक खेलाडी रहने बताए ।

ब्राजिल र क्रोएसियाको खेल नेपाली समय अनुसार ७.४५ बजे सुरु हुने छ ।