ब्रसेल्स (एजेन्सी) – फिफा विश्वकपको तयारीमा रहेका दुई ठूला टोली बेल्जियम र पोर्चुगलले शनिबार भएको मैत्रीपूर्ण खेलमा गोलरहित बराबरी खेलेका छन् ।

क्रिस्टियानो रोनाल्डोविना उत्रिएको पोर्चुगलले आक्रामक रुपमा बेल्जियमलाई दबाब दिन सकेन । बेल्जियमका डिफेन्डर जान भर्टोन्घनले दोस्रो हाफमा गरेको शक्तिशाली प्रहर पोर्चुगलका गोलरक्षक बेटोले उत्कृष्ट ढंगले बचाएका थिए । समूह जी मा रहेको बेल्जियमले अन्य अवसर सिर्जना गरेपनि गोल गर्न भने सकेन । छनोट दौरान बेल्जीयमले युरोपकै सर्वाधिक ४३ गोल गरेको थियो ।

रियल म्याड्रिडलाई च्याम्पियन्स लिग उपाधि दिलाएपछि विश्राममा रहेका रोनाल्डोले अर्को खेलमा खेल्ने प्रशिक्षकले बताएका छन् । रोनाल्डोविना पोर्चुगलको आक्रमण फितलो देखिएको थियो । टोलीले प्राप्त गरेको १३ अवसरमा ३ प्रहारले मात्र पोस्टको दिशा लिएको थियो । पोर्चुगलको फितलो प्रदर्शनले पनि रोनाल्डो टोलीका लागि कति महत्त्वपूर्ण छ भन्ने प्रष्ट पारेको छ ।

खेलको दोस्रो हाफको सुरुआतमै बेल्जियमका डिफेन्डर भिन्सेन्ट कम्पनिले भने मैदान छाड्नु पर्यो । उनले साधारण चोटका कारण मैदान छाडेपनि विस्तृत विवरणका लागि आइतबार स्क्यान गरिने बुझिएको छ । पछिल्लो पटक युरोपेली च्याम्पियनसिपमा पनि कम्पनि चोटका कारण टोलीमा रहेका थिएनन् । मैत्रीपूर्ण खेलको सुरुआतमा अर्का डिफेन्डर भर्टोन्घनलाई सय खेल खेलेको अवसरमा विशेष सम्मान गरिएको थियो ।