सिमरा (हाम्रो खेलकुद) – सिमरामा जारी प्रथम मेयर कप फूटवल प्रतियोगिता अन्तर्गत शनिवार भएको खेलमा वडा नं. २२ र वडा नं. ७ विजयी भएको छ । सिमरा रंगशालामा भएको पहिलो खेलमा वडा नं. २२ ले वडा नं. १६ लाई र दोस्रो खेलमा वडा नं. ७ ले वडा नंं. २४ लाई पराजित गरेको हो ।

प्रतिस्पर्धामक पहिलो खेलमा वडा नं. २२ लाई जित दिलाउन रोशन स्याङबो र सुशान्त घलानले गोल गरे । वडा नं. १६ का लागि उर्गेन लामाले गोल गरेका थिए । वडा नं. १६ ले लिएको अग्रता उल्टाउदै वडा नंं २२ ले जीत हात पारेको हो ।

खेलको १९औं मिनेटमा उर्गेन लामाले गोल गर्दै वडा नंं १६ लाई अग्रता दिलाएका थिए । त्यसको तीन मिनेट बित्न नपाउदै रोशन स्याङबोले पेनाल्टीमार्फत बराबरी गोल फर्काए । वडा नं. २२ खेलको दोस्रो गोल खेलको अन्तिम समयमा गरेका थिए । निर्धारित ६० मिनेटको खेलमा सुशान्त घलानले खेलको ५० औं मिनेटमा गोल गर्दै टिमलाई जीत दिलाए ।

दोस्रो रोमाञ्चक खेलमा वडा नं. ७ का लागि खेलको ३७ औं मिनेटमा राजन चौधरीले निर्णायक गोल गरे । खेलको म्यान अफ दि म्याच वडा नंं. २४ का गोलरक्षक घोषित भए । प्रतियोगिता अन्तर्गत आईतवार वडा नं. ५ र वडा नं. ९ बीच पहिलो खेल हुनेछ । यसैगरी दोस्रो खेलमा वडा नं. १७ र वडा नं. १५ बीच प्रतिस्पर्धा हुनेछ । जीतपुरसिमरा उपमहानगरपालिकाको सहयोगमा सामुदायिक बिकासशील क्लबले आयोजना गरेको प्रतियोगिताको बिजेताले ५० हजार रुपैयाँ प्राप्त गर्नेछ ।