लिस्बन (एजेन्सी)– विश्व कपका सहभागी राष्ट्रका खेलाडी अहिले तयारीमा व्यस्त छन् । तर, पोर्चुगलका कप्तान क्रिस्टियानो रोनाल्डो विदा मनाइरहेका छन् । उनका प्रशिक्षक फर्नान्डो सान्टोसलाई पनि रोनाल्डोलाई टोलीमा आबद्ध हुन कुनै हतार नभएको बताउँछन् । केहि समयको विश्रामले उनलाई थप प्रतिबद्ध बनाउनेमा प्रशिक्षक सान्टोस विश्वस्त छन् ।

गत शनिबार मात्र रोनाल्डो सम्मिलित रियल म्याड्रिडले लगातार तेस्रो पटक च्याम्पियन्स लिग उपाधि जितेको थियो । त्यसयता भने उनी विदामा छन् । विश्व कपका लागि पूर्ण रुपमा उत्साहका साथ फर्कनलाई पनि उनका लागि यो विदा अर्थपूर्ण हुने अनुमान छ । प्रशिक्षक सान्टोस आफ्ना सुपरस्टारको अहिलेको अवस्था हेर्न आवश्यक नरहेका र उनी लयमा फर्कनेमा विश्वस्त छन् ।

‘रोनाल्डो विदामा छन् । म उनलाई बोलाउन हतारिनेमा छैन । सिजनभरको खेलबाट उनी पक्कै पनि थकानमा छन्,’ उनले भने, ‘मैले अहिले उनीसँग कुरा गरेको छैन । आशा छ , उनको विदा राम्रो भएको होला । उनी फर्कदा राम्रो लयमा हुनेछन् । हाम्रो लागि त्यहि महत्वपूर्ण छ ।’ म्यानचेस्टर युनाइटेडका पूर्व स्टारले विश्व कप छनोटमा राष्ट्रिय टोलीका लागि सर्वाधिक १५ गोल गरेका थिए ।

झन्डै दुई सातापछि सुरु हुने रसिया विश्वकपमा पनि रोनाल्डो टोलीका मुख्य हतियार हन् । तुलानात्मक रुपमा पोर्चुगल कठिन समूह छ । जसमा स्पेन, इरान र मोरोक्को छन् । सान्टोसको टोलीले विश्व कपमा १५ जुनमा स्पेनको सामना गर्नुअघि आज बेल्जियमसँग खेल्दै छ र प्रशिक्षकको भनाई अनुसार उनी आजको खेलमा सामेल हुने छैनन् ।