मस्को (एजेन्सी) – फिफा विश्वकप २०१८ सुरु हुन अब १३ दिन मात्र बाँकी छ । रसियाको ११ सहरमा हुने विश्वकप फुटबलमा ३२ टोलीको सहभागिता रहेको छ ।  ब्राजिलमा आयोजित पछिल्लो संस्करणमा जर्मनीले अर्जेन्टिनालाई फाइनलमा पराजित गर्दै उपाधि जितेको थियो । 

जर्मनी यस पटक पनि उपाधिको दावेदारको रुपमा लिइएको टोली हो ।  प्रशिक्षक जोकिम लोले अनुभवी र युवा खेलाडीको सम्मिश्रण गरेर बलियो टोली उतार्ने प्रयास गर्दैछन् ।  उनले चोटका बावजुद पनि केहि अनुभवी खेलाडीलाई टोलीमा समेटेका छन् ।  गोलरक्षक म्यानुएल नोएर, डिफेन्डर जेरोम बोटेङ जस्ता खेलाडी पूर्ण फिट नभए जर्मनीलाई केहि कठिन हुनेछ ।

फरवार्ड थोमस मुल्लर सन् २०१० विश्वकपका गोल्डेन बुट विजेता र २०१४ विश्वकपका सिल्भर बुट विजेता हुन् । उनले दुवै विश्वकपमा ५-५ गोल गरेका थिए । २०१० को विश्वकपको उत्कृष्ट युवा खेलाडी पनि चुनिएका मुलर २०१४ को अल-स्टार ११ मा लियोनल मेस्सी र नेयमारसँगै अग्रपंक्तिमा परेका थिए । यसपटक पनि जर्मनीले विश्वकप उपाधि रक्षा गर्न उनीबाट धेरै अपेक्षा गरेको छ ।

खेलमा फुर्तिका लागि चिनिने मुलर ३६ गोलसहित जर्मनीका लागि दशौं सर्वाधिक गोलकर्ता हुन् । त्यस्तै विश्वकपमा १० गोलसहित उनी प्रतियोगिताका आठौं सर्वाधिक गोलकर्ता हुन् । यस सिजन बायर्न म्युनिख र जर्मनीका लागि कुल ४८ खेलमा सहभागी हुँदै मुलरले १६ गोल र १६ असिस्ट गरे । यस सिजन बायर्न म्युनिखबाट लिग जितेका उनी लिगमा सर्वाधिक असिस्ट गर्ने खेलाडी पनि हुन सफल भए । क्लब टोलीमा जमेका मुलर आफ्नो फर्मलाई राष्ट्रिय टोलीमा पनि जारी राख्ने सोचमा हुनेछन् ।

हेर्नुहोस् जर्मनीको प्रारम्भिक विश्वकप टोली ।