काठमाडौं (हाम्रो खेलकुद)– म्याच फिक्सिङको आरोपमा मुद्दा खेपिरहेका राष्ट्रिय फुटबल टोलीका पूर्व खेलाडी अन्जन केसी अर्को अभियोगमा पक्राउ परेका छन् । यसै साता सम्पन्न इन्डियन प्रिमियर लिग (आइपिएल) र च्याम्पियन्स लिग फाइनलको क्रममा सट्टेबाज अखडा सञ्चालन गरेको आरोपमा केसीसहित अन्य छ जना पक्राउ परेका हन् ।

गौरव तिवारी नाइके रहेको भनिएको गिरोहमा केसीसहित दीनेश बोगटी, नरेन्द सुवाल, विजय श्रेष्ठ छन् । उनीहरुलाई प्रहरीले मंगलबार सार्वजनिक गरेको हो । प्रहरीका अनुसार सट्टेबाजीमा संग्लग्न ६ जनाको छुट्टाछुट्टै कार्यक्षेत्र थियो । सबैको संयोजन भने भने तिवारीले गर्ने गरेको बताइएको छ ।

तिवारीले बेलायतबाट फरक फरक समयमा २४ वटा अनलाइन एकाउण्ट खोलेर त्यसैमार्फत सट्टेबाजीको कारोबार चलाउँथे । त्यही एकाउण्टमध्ये एउटा एकाउण्ट केसीको जिम्मामा रहेको बताइएको छ । महानगरिय प्रहरी प्रमुख एसएसपी विश्व पोखरेलले तिवारीलाई पक्राउ गरी उनको साथबाट बरामत गरिएको डकुमेन्टका आधारमा अन्य पाँच जना पक्राउ गरिएको बताएका छन् ।

आईपीएलका खेलहरुमा कम्तिमा २५ हजारदेखि बढीमा १५ लाखसम्मको बेटिङ खेलाइएको प्रहरीको दाबी छ । कुन खेलमा कति रकम सट्टेबाजी भएको थियो भन्नेबारेमा अनुसन्धान भइरहेको एसएसपी पोखरेलले बताए ।

केसीको अनलाइन एकाउण्टबाट २ करोड ७७ लाख, ५ हजारको कारोबार भएको देखिएको र गिरोहबाट ७ करोड ४७ लाख २ हजारको कारोबार भएको प्रमाण फेला परेको बताइएको छ । प्रहरीले छ जनाविरुद्ध ठगी मुद्दा दायर गरी जिल्ला अदालतमा म्याद थपका लागि पठाइसकेको छ । ्
राष्ट्रिय फुटबल टोलीबाट खेल्दा विभिन्न देशको खेलमा फिक्सिङ गरेको आरोपमा तीन वर्षअघि थ्री स्टार पूर्व प्रशिक्षक समेत रहेका केसी अन्य पाँच खेलाडीसँगै पक्राउ परेका थिए । अहिले पनि उनीहरुविरुद्धको मुद्दा विशेष अदालतमा विचाराधिन छ । त्यहि बीचमा पाँचै जनालाई फिफाले फुटबलमा आजीवन प्रतिबन्ध लगाएको थियो ।