मस्को (एजेन्सी) – अघिल्लो पटकको उपविजेता अर्जेन्टिना अबको १६ दिनपछि सुरु हुने विश्वकपमा उपाधि जित्ने होडमा हुने छ । अग्रपंक्तिमा स्टार खेलाडीहरुले भरिपूर्ण रहे पनि डिफेन्समा भने अर्जेन्टिना केही पछि परेको छ ।

अर्जेन्टिनालाई विश्वकपको दाबेदार मानिंदै आएको थियो तर छनोट चरणमा कठिन यात्राले केही सङ्का उत्पन्न भएको थियो । त्यस्तै स्पेनसँग मैत्रीपूर्ण खेलमा ६-१ को हारपश्चात थप आलोचना सुरु भएको हो । तर स्टार लियोनल मेस्सी, सर्जियो अगुएरो, गोन्जालो हुग्वाइन र पौलो डिबाला लगायत खेलाडीलाई आफ्नो प्रदर्शनले आलोचकहरुलाई शान्त बनाउने मौका रहेको छ ।

विश्वकपमा कुल ३२ राष्ट्र सम्मिलित छन् । प्रतियोगिताको प्रत्यक समूहमा चार टोली छन् र समूह चरणका खेलपश्चात शीर्ष २ टोली राउन्ड अफ १६ मा प्रवेश गर्नेछन् । प्रतियोगितामा सहभागी ३२ मध्ये २० टोलीले यसअघिको संस्करणमा पनि सहभागिता जनाएका थिए । यसपटक विश्वकपमा दुई टोलीले पहिलोपटक सहभागिता जनाउँदै छन् ।

आइसल्याण्ड र पानामाको यो पहिलो विश्वकप यात्रा हो । ११ सहरका १२ रंगशाला प्रयोग हुने प्रतियोगिताको फाइनल खेल जुलाई १५ तारिखमा मस्कोको लुझिन्की रंगशालामा हुनेछ । १४ जुनबाट सुरु हुने प्रतियोगितामा कुल ६४ खेल खेलिनेछ । प्रतियोगिताको आधिकारिक बल एडिडासले उत्पादन गर्नेछ । यसपटक एडिडासले सन् १९७० को विश्वकपलाई आधार मानेर तेल्स्टार १८ नामक बल प्रयोग गर्नेछ ।