रियो दि जेनेरियो (एजेन्सी)– स्टारहरुले भरिएको टिटेको ब्राजिल अघिल्लो विश्व कपको पिडालाई यसपटक अवश्य पनि भुलाउने कोशिसमा हुनेछ । घरेलु मैदानमा चार वर्षअघि भएको विश्व कपको सेमिफाइनलमा ब्राजिलले जर्मनीसँग ७–१ लज्जास्पद हार बेहोरेको थियो । अर्को दक्षिण अमेरिकी टोली अर्जेन्टिनालाई हराउँदै जर्मनी विश्व कप विजेता बनेको थियो ।

नेयमारको पुनरागमनसँगै ब्राजिलले छैटौं पटक विश्वकप जित्ने अपेक्षा गरेको छ । चोटमुक्त भएर फर्केका नेयमार पछिल्लो साता अभ्यासमा व्यस्त रहे । यसले पनि ब्राजिलियन समर्थकलाई थप उत्साहित बनाएको छ । शनिबार भने नेयमार प्रेमिका र टोलीका अन्य साथीसँग रमाइलोमा व्यस्त रहे ।

प्रेमिका ब्रुना मार्कीजेनी, पेरिस सेन्ट जर्मेन (पिएसजी) का सहकर्मी थियागो सिल्भा, बार्सिलोनाका प्ले मेकर फिलिप्प काउटिन्हो र बेन्जिङ गोउनका रेनाटो अगुस्टोसँग हेलिकप्टर यात्रामा निस्केका थिए । रसिया विश्व कप नजिकै गर्दा नेयमारको पुनरागमनले टोली र समर्थकलाई उत्साहित बनाएको छ ।

पछिल्लो साता फिटनेस परिक्षणपछि उनी पुरा साता अभ्यासमा व्यवस्त रहे । ब्राजिल फुटबल महासंघले जारी गरेको फुटेजमा पिएसजीका फरवार्ड पासिङ, ड्रिब्लिङ लगायतमा व्यस्त रहेको देखिएको थियो । खुट्टाको चोटका कारण नेयमार फेब्रुअरीदेखि मैदान बाहिर छन् । ब्राजिलमै उनको खुट्टाको शल्यक्रिया गरिएको थियो । यद्दपी ब्राजिलको प्रशिक्षणमा सञ्चारमाध्यमलाई भने खुला गरिएको थिएन ।

टोली लन्डन जाने तयारीमा रहेकोले ब्राजिलियन खेलाडीलाई आइतबार बिहानसम्मको छुट्टि दिएको थियो । टिटेको टोली मे २८ देखि जुन ८ सम्म टोटेनह्यामको अतिथिको रुपमा रहनेछ । ब्राजिल र क्रोएसियाबीच एनफिल्डमा जुन ३ मा मैत्रैपूर्ण खेल हुनेछ । त्यसको सात दिनपछि ब्राजिलले अस्ट्रियासँग खेल्नेछ ।

विश्व कपका लागि सोचीमा रहेको फाइभ स्टार होटलमा ब्राजिलियन टोलीका लागि व्यवस्था गरिएको छ । समूह ‘इ’ मा ब्राजिलले जुन १७ मा स्विट्जरल्यानडको सामना गर्दै विश्व कपको सुरुवात गर्नेछ । समूहमा कोस्टारिका र सर्बिया रहेका छन् ।