किभ (एजेन्सी)– क्रिस्टियानो रोनाल्डो रियल म्याड्रिडमै रहने विश्वास क्लबका लेफ्ट ब्याक मार्सेलोले विश्वास व्यक्त गरेका छन् । रोनाल्डोले रियलमा रहने विषयमा शंका व्यक्त गरेपछि मार्सेलोको यस्तो प्रतिक्रिया आएको हो ।

लिभरपुललाई ३–१ ले हराउँदै शनिबार रियलले लगातार तेस्रो पटक च्याम्पियन्स लिगको उपाधि जितेको थियो । दोस्रो हाफमा गेराथ बेलले २ गोल गरेपछि रियलको जित सम्भव भएको थियो । यद्दपी रोनाल्डोको प्रदर्शन भने सोचे अनुरुप हुन सकेन । यद्दपी टोलीलाई फाइनल सम्म पुर्याउन रोनाल्डोको भूमिका महत्वपूर्ण रहेको थियो ।

‘मलाई लाग्छ उनी क्लबमै रहनेछन् । तर मलाई त्यो विषयमा थाहा छैन ,’ ब्राजिलियन रक्षकले भने, ‘म निर्णय गर्ने मध्येको होइन । यो रोनाल्डो र क्लबबीचमा तय हुने विषय हो । तर मलाई लाग्छ उनी बस्नेछन् ।’

च्याम्पियन्स लिग फाइनल पछि रोनाल्डोले अर्को सिजन क्लबमा नरहन सक्ने संकेत गरेका थिए । यद्दपी उनले प्रष्ट पार्न चाहेनन् । उनले यति भने, ‘सबै विषयमा केहि दिनमा समर्थकहरुलाई जानकारी गराउने छु ।’

सन् २००९ मा म्यानचेस्टर युनाइटेडबाट रियल पुगेका रोनल्डोको उच्च प्रदर्शनमा क्लबले थुप्रै सफलता प्राप्त गरेको थियो । मैदान भित्र मात्र होइन रोनाल्डो ड्रेसिङ रुपमा पनि अन्य खेलाडीलाई उत्साहित पार्दै आएका छन् । यदि उनले क्लबमै बस्ने निर्णय गरे भने क्लबले तत्काल सम्झौता गर्ने अनुमान गरिएको छ ।