काठमाडौं (हाम्रो खेलकुद) – सबैभन्दा चर्चित तथा अपेक्षित फुटबल प्रतियोगिता फिफा विश्वकपको २१ औं संस्करण जुन १४ देखि रुसमा सुरु हुँदैछ । हाम्रो खेलकुद डटकमको यस ‘विश्वकपमा हेर्नलायक २० खेलाडी’ सुचीको नम्बर १८ मा रहेका छन् स्पेनका मिडफिल्डर डेभिड सिल्भा ।

म्यानचेस्टर सिटीका मिडफिल्डर डेभिड सिल्भाको २०१७/१८ सिजन निकै आकर्षक रह्यो । सबै प्रतियोगितामा १० गोल र ११ असिस्ट गर्दै उनले सिटीलाई उपाधि जिताउन तथा लिगमा १५ विभिन्न नयाँँ कीर्तिमान राख्न महत्त्वपूर्ण भुमिका खेले । मिडफिल्डमा केभिन डे ब्रुयनसँग उनले गरेको साझेदारी हेर्न लायक नै थियो ।

विश्वकपमा पनि सिल्भाको स्पेनको मिडफिल्डमा भुमिका उत्तिकै महत्त्वपूर्ण हुने छ । डिफेन्सबाट बल लिँदै मिडफिल्डबाट फरवार्डहरुसम्म पुर्‍याउने उनले भूमिका खेल्नेछन् । उनी आफ्नो रचनात्मक खेलकै लागि धेरै चिनिन्छन् ।

दिग्गज मिडफिल्डर आन्द्रेस इनिएस्टा शतप्रतिशत फिट नभएकाले र थियागो अलाकान्टारा, कोके, इस्को र मार्को एसेन्सियो लगायत खेलाडीहरु राष्ट्रिय टोलीमा तुलनात्मक रुपमा नयाँँ भएकाले सिल्भामा थप जिम्मेवारी आउने देखिन्छ ।

स्पेनले २०१० को विश्वकप जित्दा सिल्भा टोलीमा स्थापित भइसकेका थिएनन् । २०१२ को युरोमा भने उनले २ गोल र ३ असिस्ट गर्दै आफ्नो टोलीलाई उपाधि दिलाए । २०१४ को विश्वकपमा पनि उनले केवल १ खेल सुरुवात गर्न सके भने २०१६ को युरोकपमा स्पेनले खेलेको चारै खेलमा सिल्भा महत्त्वपूर्ण सदस्यका रुपमा उदाए ।

विश्वकप छनोटमा उनी टोलीका अभिन्न अङ्ग रहे । सिटीका लागि डिफेन्सिभ मिडफिल्ड, अट्याकिङ मिडफिल्ड र दायाँ विङमा खेलेकाले स्थितिले मागेअनुरुप उनी आफ्नो शैलीलाई ढाल्न सक्छन् । त्यसैले पनि दाबेदार मानिएको स्पेनको यस अभियानमा लयमा रहेका सिल्भाको भूमिका अति महत्त्वपूर्ण हुने छ ।

हेर्नुहोस् स्पेनको विश्वकपको अन्तिम टोली

विश्वकपमा हेर्नलायक २० खेलाडी – नम्बर १९
विश्वकपमा हेर्नलायक २० खेलाडी – नम्बर २०