लिभरपुल (एजेन्सी)– लिभरपुलले च्याम्पियन्स लिगको उपाधि जितेको खण्डमा टोलीका पूर्व खेलाडी फिलिप कौटिन्होले पनि पदक पाउने छन् । विजेता टोलीले ४० वटा पदक पाउनेछ । लिभरपुल र रियल म्याड्रिडबीच आज च्याम्पियन्स लिग फाइनल हुँदैछ ।

च्याम्पियन्स लिगको समूह चरणमा लिभरपुलको उच्च प्रदर्शनमा कौटिन्होको पनि भूमिका महत्वपूर्ण रहेको थियो । जनवरीमा ठूलो रकममा उनी बार्सिलोनामा आबद्ध भएका थिए । च्याम्पियन्स लिगको समूह चरणमा लिभरपुलबाट ५ खेल खेल्ने क्रममा काउटिन्हाले ५ गोल गर्नुका साथै २ असिस्ट गरेका थिए । त्यसैले पनि क्लबले जितेको खण्डमा पदक दिने निर्णय पूर्व खेलाडीको सम्मानका रुपमा हेरिएको छ ।

पाँच वर्षअघि लिभरपुलमा आबद्ध ब्राजिलियन स्टार छाड्ने बेलासम्म क्लबको ठूलो सम्पत्तीका बनिसकेका थिए । सबै प्रतियोगितामा गरि लिभरपुलका लागि २ सय खेल खेलेका उनले ५४ गोल गर्नुका साथै थुप्रै असिस्ट गरेका थिए । उनको यो प्रदर्शनले क्लबको महान खेलाडीको सुचिमा राख्न पर्याप्त हुने कतिपयको तर्क छ ।

लिग वा अन्य प्रतियोगितामा टोली असफल हुँदा पनि कौटिन्होको व्यक्तिगत प्रदर्शनबाट भने लिभरपुलका समर्थक खुसी नै रहने गरेका थिए । यदि लिभरपुलले फाइनल जित्यो भने कौटिन्होसँग यो सिजन तीन वटा पदक हुनेछन् ।

बार्सिलोनाले यो सिजन कोपा डेल रे र ला लिगा जित्दा उनी टोलीका महत्वपूर्ण सदस्य रहेका छन् । उनीसँग यहि वर्ष अर्को सफलता दिलाउने टोलीको सदस्य बन्ने सम्भावना पनि बाँकी छ । रसियामा हुने विश्व कपमा यदि ब्राजिलले जित्न सकेको खण्डमा काउटिन्होका लागि विशेष वर्ष पक्कै हुनेछ ।