काठमाडौं (हाम्रो खेलकुद) – अखिल नेपाल फुटबल संघ (एन्फा) का नवनिर्वाचित अध्यक्ष कर्मा छिरिङ शेर्पाले क्वालालुम्पुर स्थित एसियाली फुटबल महासंघ (एएफसी) को प्रधान कार्यालयमा महासचिव डाटो विन्सर जोनसँग भेटवार्ता गरेका छन्।

तस्बिर : एएफसी

शेर्पासँगै एन्फाका महासचिव इन्द्रमान तुलाधर र उपाध्यक्ष पंकज नेम्बाङ सहितको टोलीले एएफसी प्रतिनिधिहरूसँग भेट गरे। विन्सरले एन्फालाई लिग कार्यक्रम तथा विकासका कार्यमा पूर्ण रुपमा सहयोग गर्ने विश्वास दिलाएका छन्।

“नेपाल सन् १९७१ देखि एएफसीको सदस्य हो। नेपाल दक्षिण एसियाको महत्वपूर्ण सदस्यमध्य एक हो। नेपाली फुटबलको विकासमा हामी सधैं साथ् दिनेछौं “,विन्सरले एएफसीको आधिकारिक वेबसाइटमा जनाएका छन् ।

लिग कुनै पनि देशको फुटबलको धड्कन रहेको र नेपालमा लिग सुचारु हुने खबरले एएफसी प्रोत्साहित रहेको विन्सरले बताए। करिब पाँच वर्षको अन्तरालपछि आउँदो असोजमा नँया कार्यसमितिले सहिद स्मारक ‘ए’ डिभिजन लिग गराउने निर्णय गरेको थियो। एएफसीले लिग सुचारु गर्न, नेपालको ग्रासरुट फुटबलको विकासमा मद्दत पुर्याउन र विभिन्न प्राविधिक प्रशिक्षणमा सहयोग गर्ने पनि प्रतिबद्दता जनाएको छ।

त्यस्तै एन्फाका अध्यक्ष शेर्पाले एएफसीलाई धन्यबाद दिँदै नेपाली फुटबलको विकासमा एन्फाले एएफसीको सहयोगको अपक्षा गरेको बताए।