किएभ (एजेन्सी) – रियल म्याड्रिड फरवार्ड क्रिस्टियानो रोनाल्डोले लिभरपुलका मोहमद सलाह उनीभन्दा फरक किसिमको खेलाडी रहेको बताएका छन् । शनिबार हुने च्याम्पियन्स लिग फाइनलअघि टेलिभिजन अन्तर्वार्तामा रोनाल्डोले यस्तो अभिव्यक्ति दिएका हुन् ।

लिभरपुलका लागि सलाहले जारि सिजन ४४ गोल गरेका छन् । यता रोनाल्डोले भने रियलका लागि ४३ गोल मात्र गरेका छन् । यसैकारण पनि सलाह र रोनाल्डोको तुलना गरिएको हो । रोनाल्डोले भने सलाहसंग उनलाई दाँज्न अहिले नै सम्भव नभएको बताएका छन् । उनले विभिन्न कारणमध्ये दुई खेलाडीको उचाईलाई पनि एक कारण मानेका छन् ।

‘दर्शकहरुले मलाई अन्य खेलाडीसंग दाँजेर हेरेका छन् । तर मा सबैभन्दा फरक छु । सलाह पनि फरक छन्,’ उनले भने, ‘सलाह देब्रे खुट्टाले खेल्छन् भने म दाहिनेले । उनी म भन्दा होचा पनि छन् । तर उनले जारि सिजन निकै उत्कृष्ट प्रदर्शन गरेका छन् ।’

सलाह करियरकै पहिलोपटक युरोपेली प्रतियोगिताको फाइनल खेल्दै छन् । रोनाल्डो भने च्याम्पियन्स लिग  ५ पटक जित्ने इतिहासकै पहिलो खेलाडी बन्ने सुरमा छन् । रोनाल्डो यस खेललाई लिएर उत्साहित पनि छन् । ‘यो निकै विशेष प्रतियोगिता हो । व्यक्तिगत रुपमा मैले य्तास प्रतियोगितामा धेरै सफलताहात पारेको छु । मलाई यहाँ खेल्न निकै मनपर्छ,’ उनले थपे , ‘पांच पटक च्याम्पियन्स लिग जित्नु सपनामा पनि सोचेको थिएन । यदि हामीले उपाधि हात पारे त्यो अविश्वसनीय हुनेछ ।’

च्याम्पियन्स लिग फाइनल शनिबार राति युक्रेनको किएभमा हुनेछ । लिभरपुल र रियल म्याड्रिड दुवै टोलीका खेलाडी किएभ पुगिसकेका छन् । खेलका लागि दुवै टोलीले घरेलु लिगमा महत्त्वपूर्ण खेलाडीलाई विश्राम दिएका थिए ।