कोब (एजेन्सी) – सफल मिडफिल्डर आन्द्रे इनियेस्टा जापानीज क्लब भिसेल कोबेमा आबद्ध भएका छन् । ३४ वर्षे स्पेनिस मिडफिल्डरले जे लिगको क्लबसँग केहि वर्षको सम्झौता गरेको बताइएको छ ।

सानै उमेरदेखि बार्सिलोनामा आबद्ध इनियेस्टाले २२ वर्षे खेल जीवनको पूर्णविराम लगाउँदै क्लब छाडेका थिए । बार्सिलोनाको जर्सीको प्रायोजक राकुटेनको कारणनै उनको जापानीज क्लबमा सम्झौता सम्भव भएको बताइएको छ । राकुटेनका प्रमुख कार्यकारी अधिकृत हिरोशी मिकितानीसँगको मित्रताकै कारण उनी जापानीज क्लबमा आबद्ध भएको विश्वास गरिएको छ ।

सम्झौतापछि विज्ञप्ती जारी गर्दै राकुटेनले भनेको छ,‘ इनियेस्टाले बार्सिलोनामा आफ्नो खेल जीवनलाई अघि बढाएका थिए । युवा खेलाडीका लागि क्लबमा बेग्लै खाले लिग प्रणाली छ । उनको आबद्धताले भिसेल कोबेले समर्थक बढाउने भन्ने मात्र नभई विश्वस्तरीय खेलाडीको आगमनले फुटबल विकासका लागि र युवा पुस्तालाई प्रेरणा मिल्छ भन्ने विश्वास गरेका छौं ।’

एसियाकै उत्कृष्ट क्लब मध्ये बन्ने लक्ष्य लिएको कोबेमा इनियेस्टाको आगमनले जापान र एसियाकै फुटबललाई हौसला मिल्ने विश्वास लिएको छ । इनियेस्टाले बार्सिलोनाका लागि ६ सय ७४ खेल खेलेका थिए ।

उनले आइतबार रियल सोसिडाडविरुद्ध बार्सिलोनाका लागि अन्तिम खेल खेलेका थिए । कोबेमा आर्सनल र बायर्न म्युनिखका पूर्व स्ट्राइकर लुकास पोडोलोस्की पनि रहेका छन् । पोडोलोस्कीले गत सिजन क्लबको कप्तानी गरेका थिए ।