लन्डन (एजेन्सी) – इंग्ल्यान्ड राष्ट्रिय फुटबल टोलीका कप्तान ह्यारी केनले इंग्लिस टोली रसियामा हुने विश्वकपको दावेदार टोली रहेको अभिव्यक्ति दिएका छन् ।

२४ वर्षीय फरवार्ड केनलाई प्रशिक्षक साउथगेटले केहि साताअघि नै कप्तानको जिम्मेवारी सुम्पने निर्णय सुनाएका थिए । यद्यपी यसको आधिकारिक घोषणा भने मंगलबार भएको थियो । प्रिमियर लिग क्लब टोटेनहमका लागि सिजनमा ४१ गोल गरेका केनले आफ्नो टोलीलाई लिगमा तेस्रो स्थानमा ल्याउन महत्त्वपूर्ण भूमिका खेलेका थिए ।

‘ विश्वकप उपाधि उठाएको सपना नदेखी बस्न सकिन्न । विश्वको सबैभन्दा ठुलो प्रतियोगिता जित्ने सबैको बाल्यकालदेखिको सपना हुन्छ,’ उनले भने, ‘ हामीलाई विश्वास छ हामीले यो विश्वकप जित्न सक्छौं । अहिले हामी जित्न सक्दैनौं भन्नु बेवकुफी हुनेछ । हामी आफुले सकेको उत्कृष्ट प्रदर्शन दिने प्रयासमा हुनेछौं ।’

केनले इंग्ल्यान्डको टोली अन्य दावेदार जतिको बलियो नभएपनि युवा जोशले भरिपूर्ण रहेको बताए । ‘ हामी बलियो दावेदार नहुन सक्छौं । तर जसरी लिभरपुलले च्याम्पियन्स लिग फाइनल पुगेर आफ्नो टोलीलाई सिद्ध गरेको छ । हामी अर्को उदाहरण बन्न चाहन्छौं,’ केनले बताए । राष्ट्रिय टोलीका लागि २३ खेलमा १२ गोल गरेका केन टोलीको आक्रमणका केन्द्रबिन्दु पनि हुन् ।

केनले यसअघि विश्वकप छनोट अन्तर्गत स्कटल्यान्डविरुद्धको खेलमा पहिलोपटक टोलीको कप्तानी सम्हालेका थिए । उनले उक्त खेलको अन्त्यतिर बराबरी गोल गर्दै खेललाई २-२ को अवस्थामा ल्याएका थिए । त्यसयता उनले तीन खेलमा टोलीको कप्तानी गरिसकेका छन् । केनबाहेक टोटेनहमकै एरिक डायर र लिभरपुलका जोर्डन हेन्डरसनले पनि कप्तानी गरेका छन् ।

इंग्ल्यान्डले विश्वकपको पहिलो खेलमा ट्युनिसियाको सामना गर्नेछ । १८ जुनमा पहिलो खेल सकिएपछि इंग्ल्यान्डले पानामा र बेल्जियमको सामना गर्नेछ । टोली १२ जुनमा रसिया पुग्नेछ ।