रियो (एजेन्सी) – आगामी जुन तेस्रो सातादेखि सुरु हुने फिफा विश्वकप २०१८ मा ब्राजिललाई उपाधिको प्रमुख दावेदार टोलीको रुपमा हेरिएको छ । त्यसो त ब्राजिल सधैं बलियो दावेदारको रुपमा विश्कपमा सहभागी हुने टोली हो । सर्वाधिक ५ पटक विश्वकप जितेको ब्राजिलले पछिल्लोपटक सन् २००२ मा उपाधि जितेको थियो ।

यस पटक उपाधिको दावेदार मानिएको ब्राजिलले प्रतियोगिता सुरु नहुँदै केहि खराब समाचार भने सुन्नुपरेको छ । डिफेन्डर डानी आल्भेस घाइते हुनुले टोलीलाई ठुलो चोट पुगेको थियो । यसबाहेक नेयमार पूर्ण रुपमा फिट नहुने भन्ने डर पनि समर्थकमाझ कायमै छ । यस्तो अवस्थामा अर्का आक्रामक खेलाडीको चोटको खबरले ब्राजिलियन टोलीलाई टाउकोदुखाइ बनेको छ ।

इटालियन क्लब युभेन्ट्सलाई घरेलु लिग जिताउन महत्त्वपूर्ण भूमिका खेलेका विंगर डग्लस कोस्टाले चोट बोकेका छन् । प्रशिक्षणका दौरान उनो तिघ्रामा चोट लागेको ब्राजिलियन फुटबल फेडेरेसनका प्रमुख डाक्टर रोड्रीगो लास्मारले जानकारी दिएका छन् । उनले प्रशिक्षणका दौरान कोस्टा तिघ्राको चोट देखाएपछि मैदान छाडेको बताए ।

कोस्टाले यसपटक सुरुआती रोजाईमा मौका पाउने सम्भावना कम भएपनि उनको भूमिका नेयमारको अनुप्सथितिमा भर पर्ने बुझिएको थियो । नेयमार चोटका कारण खेल्न नसक्दा उनि नै प्रशिक्षक टिटेको पहिलो विकल्पका रुपमा दरिएका थिए । उनको चोट धेरै गम्भीर नभएका कारण केहि दिन विश्रामपछि मैदानमा आउने लास्मरले जनाएका छन् ।

ब्राजिलले विश्वकपको समूह चरणमा स्विटजरल्यान्ड र क्रोएसियाजस्ता युरोपका ठुला टोलीको सामना गर्दैछ । नेयमारले विश्वकप अगाडी हुने अभ्यास खेलमा सहभागिता जनाएर आफ्नो फिटनेस सिद्ध पार्ने बुझिएको छ । कोस्टा पनि त्यसै समयसम्म खेलमा फर्कने विश्वास प्रशिक्षक टिटेले लिएका छन् ।