जुनतारा सनसाइन महिला फुटबलको अन्तिम चारमा

सबिन सेर्मा (लिम्बु)
झापा– खुदुनाबारीको जुनतारा महिला फुटबल क्लब झापाको ज्यामिरगणीमा जारी प्रथम सनसाइन महिला कप जिल्ला स्तरइय फुटबल प्रतियोगिताको सेमिफाइनलमा पुगेको छ ।

झिझिलेको सतासिधामा स्पोटिङ क्लबलाई २–१ ले हराउँदै जुनतारा अन्तिम चारमा पुगेको हो । सतासिधामले खेलमा लिएको अग्रता जोगाउन सकेन । ३४ औं मिनेटमा अनिता राईको गोलबाट सतासिधामले अग्रता लिएको थियो ।

४४ औं मिनेटमा मनीषा विष्टको गोलबाट जुनतारा खेलमा फर्केको थियो । निर्धारित ७० मिनेटको खेल सकिन ५ मिनेट बाँकी रहँदा कुसुम खतिवडाले गोल गरेपछि जुनतारा अघिल्लो चरणमा पुगेको हो । विजयी टोलीकी मनीषा खेलको म्यान अफ दी म्याच घोषित भइन् ।

मनीषाले १ हजार रुपैयाँ र ५ लिटर बाबा तेल प्राप्त गरिन् । प्रतियोगितामा बुधबार आयोजक सनसाइन महिला फुटबल क्लब ज्यामिरगणी र झापा युवा क्लबबीच पहिलो सेमिफाइनल हुनेछ ।