काठमाडौँ, माघ १६ । बाफलस्थित युनाइटेड फुट्सलले शनिबार बङ्गबन्धु गोल्डकप फुटबल प्रतियोगिता जित्ने नेपाली राष्ट्रिय टिमका कप्तान विराज महर्जनलगायत अन्य तीन खेलाडीलाई सम्मान गरेको छ ।

विराजको नेतृत्वमा नेपालले यसै साता बङ्गलादेशमा च्याम्पियन बनी २३ वर्षसम्म परेको अन्तर्राष्ट्रिय उपाधिको खडेरीलाई तोडेको थियो । युनाइटेड फुट्सलले बङ्गबन्धु गोल्डकपमा सर्वाधिक गोलकर्ता तथा ‘मस्ट भ्यालुयबल प्लेयर’ घोषित हुने स्ट्राइकर नवयुग श्रेष्ठ, डिफेन्डर रविन श्रेष्ठ र गोलरक्षक विकेश कुथुलाई पनि सम्मान गरेको थियो ।
यी चारै खेलाडीले संयुक्त रुपमा केक काट्नुका साथै एकअर्कालाई खुवाएर जितको खुशी साटे । कप्तान विराजले आफ्ना दाजु विक्रम महर्जनसँग मिलेर प्रत्येक शनिबार युनाइटेड फुट्सलमा छात्रछात्रालाई फुटबलको प्रशिक्षण दिनुहुन्छ । विक्रम पनि उमेर समूहमा नेपालको प्रतिनिधित्व गरिसकेका पूर्व फुटबलर हुन् ।
सो अवसरमा कप्तान महर्जनले अब दक्षिण एसियाली खेलकुदअन्तर्गत फुटबलमा स्वर्ण पदक जित्ने लक्ष्य भएको बताए । युवा टिम भएकोले राम्रो सुविधा र अनुभव पाएमा यो टिमले भविष्यमा अन्य ठूला उपलब्धि पनि हासिल गर्नसक्ने कप्तान विराजले बताए ।
युनाइटेड फुट्सलका सिइओ प्रकास महर्जनले कम्युनिटी विकासका लागि फुट्सल खोलेको र देशको इज्जत राख्ने राष्ट्रिय खेलाडीलाई हौसला प्रदान गर्न यो सम्मान कार्यक्रमको आयोजना गरेको जानकारी दिए ।