गाईघाट (हाम्रो खेलकुद) – दमक गोल्डकप विजेता नेपाल पुलिस क्लब रमपम उदयपुर गोल्डकप फुटबल प्रतियोगिताको पहिलो खेलमै स्तब्ध भएको छ । थरुहट रंगशाला गाईंघाटमा मंगलबार भएको अन्तिम क्वार्टरफाइनलमा पुलिस सुनसरी–११ सँग पेनाल्टी सुटआउटमा ३–२ ले पराजित भएको हो ।

निर्धारित समयको खेल ३–३ गोलको बराबरीमा सकिएपछि खेलको निर्णय पेनाल्टी सुटआउटमा भएको थियो । पेनाल्टी सुटआउटमा गोलरक्षक विनय श्रेष्ठले पुलिसका तीन प्रहार रोक्दै सुनसरीलाई सेमिफाइलमा पु¥याए । उनले सुमन लामा, विक्रम धिमाल र दिनेश राजवंशीको प्रहार रोके ।

पुलिसका रेनिज सुब्बा र अभिषेक रिजाल मात्र गोल गर्न सफल भए । सुनसरीका अनिल धिमाल, बुद्धिमान राई र निशान लिम्बुले गोल गरे । निर्धारित समयमा पुलिसले सुरुवाती अग्रता लिएपनि एक समय ३–१ ले पछि परेको थियो । खेलको छैटौ मिनेटमा राम वाजीको गोलबाट पुलिसले अग्रता लिएको थियो ।

सौजन याक्खाले २३ औं मिनेटमा सुनसरीका बराबरी गोल गरे । ४३ औं मिनेटमा तीर्थ बस्नेतले गोल गरेपछि सुनसरीले पहिलो हाफमा २–१ को अग्रता बनायो । ६४ औं मिनेटमा रोमन लिम्बुले फ्रिकिकमा सुन्दर गोल गरेपछि सुनसरी ३–१ ले अघि बढेको थियो । तर, पुलिसले ३–१ ले पछि परेपनि उत्कृष्ट कमब्याक गर्दै खेललाई ३–३ गोलको बराबरीमा ल्याएर अतिरक्त समय हुदै पेनाल्टी सुटआउटसम्म पु¥याएका थिए ।

८० औं मिनेटमा अभिषेक रिजालले गोल गरेपछि खेल ३–२ को अवस्थामा पुगेको थियो । त्यसपछि पनि हार नखाएको पुलिसका लागि कप्तान विक्रम धिमालले इन्जुरी समयमा गोल गरेपछि खेल ३–३ गोलको बराबरीमा पुगेको थियो । त्यसपछि थपिएको समयमा गोल भएन । सुनसनरीका गोलकिपर विनय म्यान अफ दी म्याच घोषित भए र उनले ७ हजार रुपैयाँ प्राप्त गरे ।

प्रतियोगितामा बुधवार थ्री स्टार क्लब र झापा–११ बीच सेमिफाइनल खेल हुनेछ । प्रतियोगिताको विजेताले ५ लाख र दोस्रो हुने टोलीले ३ लाख ५० हजार रुपैयाँ पाउनेछन् । प्रतियोगिताका सर्वोत्कृष्ट खेलाडीले ५० हजार रुपैयाँ प्राप्त गर्नेछन् ।