पेरिस (एजेन्सी)– ब्राजिलियन महान खेलाडी रोनाल्डोको भनाईले पेरिस सेन्ट जर्मेन (पिएसजी) मा नेयमारको भविष्य थप शंकामा परेको छ । रोनाल्डोले भनेका छन्, ‘मलाई थाहा छैन, नेयमार पेरिसमा खुसी छन् की छैनन् । ‘

पिएसजीमा एक सिजन नबित्दै नेयमार पुनः स्पेन फर्कने चर्चा सुरु भएको छ । उनी अर्को सिजन रियल म्याड्रिड जाने व्यापक चर्चा चलेको छ । यति बेला भने नेयमार रसियामा हुने विश्व कपका लागि फिट हुने प्रयासमा छन् ।

नेयमार लिग वानको उत्कृष्ट खेलाडी घोषित हुँदै आइतबार रियलका पूर्व स्टार रोनाल्डोले नै उनलाई ट्रफी प्रदान गरेका थिए । दुई पटकका विश्वकप विजेता रोनाल्डोले आफ्ना देशका स्टार नेयमारको तारिफ गरे । रोनाल्डोको अभिव्यक्तिले नेयमारले पिएसजी छाड्न सक्ने सम्भावनालाई थप बल दिएको छ ।

‘नेयमारले फ्रान्स र लिग वानका लागि धेरै दिएका छन्,’ उनले भने, ‘क्षमतामा मात्र होइन एउटा ब्रान्डका रुपमा उनले धेरै चिज लिएर आए । अहिले विश्वभर पिएसजी र यहाँको लिगको कुरा गर्न थालेका छन् । उनी राम्रो खेलाडी हुन् र सबै उनका बारेमा कुरा गर्छन् ।’

नेयमार एक वर्षदेखि पेरिसमा रहेपनि चोट लाग्नु दुर्भाग्यपूर्ण भएको बताए ।’ मलाई थाहा छैन उनी यहाँ खुसी छन् की छैनन्,’ उनले भने, ‘तर जीवन अघि बढ्दै जान्छ । हामीले के हुन्छ त्यसका लागि कुर्नु पर्दछ ।’

नेयमार बार्सिलोनाबाट सिजनको सुरुवातामा १ सय ९८ मिलियन पाउन्डमा पिएसजी पुगेका थिए । उनले ३० खेलमा पिएसजीका लागि २८ गोल गरेका थिए ।