गाईघाट (हाम्रो खेलकुद)– गत वर्षको सर्वाधिक दोस्रो सफल टोली रुस्लान थ्री स्टार क्लब पाँचौं रमपम उदयपुर गोल्डकप फुटबल प्रतियोगिताको सेमिफाइनलमा पुगेको छ । मोरङ ११ लाई सोमबार ४–१ ले हराउँदै थ्री स्टार अन्तिम चारमा प्रवेश गरेको छ ।

यो महिना माईभ्याली गोल्डकप विजेता थ्री स्टारले फाइनल प्रवेशका लागि रमपम झापा ११ को सामना गर्नेछ । थ्री स्टारको जितमा अजयी मार्टिनले २ तथा अनन्त तामाङ र रुपेश केसीले समान १ गोल गरे । मोरङका लागि एमबालाले गोल गरेका थिए ।

३२ औं मिनेटमा मार्टिनले गोल गर्दै थ्री स्टारलाई अघि बढाए । आफैले प्रहार गरेको बललाई रिवाउण्डमा मार्टिनले गोल गर्न सफल हुदा थ्री स्टार पहिलो हाफमा १–० ले अघि रहेको थियो । पहिलो हाफमा १–० को अग्रता बनाएको थ्री स्टारले दोस्रो हाफमा झनै सशक्त प्रदर्शन ग¥यो । ५२ औं मिनेटमा मोरङका विदेशी खेलाडी यमवालाले गोल गरेपछि खेल १–१ को बराबरीमा पुगेको थियो ।

५८ औं मिनेटमा मार्टिन्सले गोल गरेपछि थ्री स्टारले खेलमा पुनः २–१ को अग्रता बनायो । खेल सकिन ५ मिनेट बाँकी हुदा दुई गोल गरेपछि थ्री स्टारले मोरङमाथि ४–१ को सहज जित निकाल्यो । रुपेश केसीले ८५ औ मिनेट र अनन्त तामाङले ८७ औ मिनेटमा गोल गरेका थिए ।

खेल अवधिभर थ्री स्टार हावी भएको थियो । मोरङले पनि केही अवसर खेर फालेको थियो । थ्री स्टारका मार्टिन खेलको म्यान अफ दि म्याच घोषित भए । उनले नगद ७ हजार हात पारे ।

प्रतियोगिता अन्र्तगत मंगलबार विभागीय नेपाल पुलिस क्लब र सुनसरी–११ बीच खेल हुने प्रतियोगिता संयोजक किरण राईले जानकारी गराए । प्रतियोगिताको विजेताले ५ लाख रुपैयासहित शिल्ड र मेडल प्राप्त गर्नेछ । दोस्रो हुनेले ३ लाख ५० हजार पाउनेछ । प्रतियोगिताको सर्वोत्कृष्ट खेलाडीले ५० हजार रुपैयो पाउने आयोजकले जनाएको छ ।

उदयपुर गोल्डकपमा मंगलबारको खेल
पुलिसविरुद्ध सुनसरी ११