पेरिस (एजेन्सी) – फ्रान्स फुटबल लिगको तेस्रो डिभिजन क्लब लेस हर्बियर्सलाई २-० ले पराजित गर्दै पेरिस सेन्ट जर्मेन (पिएसजी) ले मंगलबार फ्रेन्च कपको उपाधि उचाल्यो । यसक्रममा उपाधि उचाल्ने बेलामा पिएसजीका कप्तान थियागो सिल्भाले विपक्षी कप्तानलाई पनि उपाधि उचाल्ने निम्तो दिए ।

स्टार फरवार्ड नेयमारको अनुपस्थितिमा उत्रिएको फ्रान्सेली लिग च्याम्पियन टोलीले पुरै समय खेल अाफ्नो पकडमा राखेको थियो । २६ अौं मिनेटमा थियागो मोट्टाको पासमा जिअोभानी ले सेल्सोले गोल गर्दै अग्रता दिलाए । दोस्रो हाफको ७४ अौं मिनेटमा एडिन्सन काभानीले पेनाल्टीमार्फत गोल गर्दै अग्रता दोब्बर पारे ।

तेस्रो डिभिजनको क्लब भएपनि हर्बियर्सले ठूला क्लबलाई पन्छाउँदै फाइनलसम्म पुगेको थियो । सिल्भाले लेस हर्बियर्सका कप्तान सबास्टियन फ्लोचोनलाई उपाधि उठाउन आमन्त्रण गरेका थिए । फ्रान्सको राष्ट्रपति समेत उपस्थित उक्त कार्यक्रममा गरेको व्यवहारले सिल्भाले विश्व फुटबल जगतमा प्रशंसा पाइरहेका छन् ।

पिएसजीको जारी सिजनमा यो तेस्रो घरेलु उपाधि हो । उपाधि उचाल्ने कार्यक्रममा नेयमार पनि उपस्थित थिए । एक महिना ब्राजिलमा रहेर चोटबाट ठिक हुने प्रयासमा रहेका नेयमार विश्वकपमा फिट हुने अनुमान गरिएको छ ।