पेरिस (एजेन्सी)– पेरिस सेन्ट जर्मेन (पिएसजी) का मार्को भेराट्टीले टोलीका स्टार नेयमारको तारिफ गर्दै उनी केहि वर्षमा विश्वकै उत्कृष्ट खेलाडी हुने विश्वास व्यक्त गरेका छन् ।

लियोनल मेस्सी र क्रिस्टियानो रोनाल्डोको बालोन डी ओरमा रहेको राजलाई नेयमारले तोड्नेमा भेराट्टी विश्वस्त छन् । सन् २००८ यता बालोन डी ओर मेस्सी र रोनाल्डोले नै जित्दै आएका छन् । त्यो निरन्तरतालाई नेयमारले भंग गर्ने धेरैले अपेक्षा गरेका छन् ।

‘रोनाल्डो र मेस्सी अहिले पनि दाबेदार हुन् । तर नेयमारको उनीहरु भन्दा ५ वर्ष कम छ । अहिले नै उनी उत्कृष्ट खेलाडी हुन्,’ भेराट्टीले अन्तर्वार्ताका क्रममा भनेका छन्, ‘आउने वर्षमा नेयमारले बालोन डी ओर जित्ने सम्भावना बढी छ ।’

विश्वकै उत्कृष्ट खेलाडी बन्ने र उपाधि जित्न आवश्यक सबै गुण नेयमारमा रहेको उल्लेख गर्दै उनले थपे, ‘अबको तीन चार वर्षमा उनले रोनाल्डो र मेस्सीको ठाँउ लिनेछन् । ‘

नेयमारसँग एउटै टोलीमा खेल्न पाउनुलाई उनले भाग्यसँग जोडेका छन् । ‘उनी विश्वका उत्कृष्ट खेलाडी मध्ये एक हुन् । उनी हाम्रो टोलीका महत्वपूर्ण खेलाडी हुन्, यद्दपी हामी एउटै खेलाडीमा निर्भर हुँदैनौं,’ उनले भने, ‘यदि उनी चोटग्रस्त हुन्थेन टोलीले अझै उच्च प्रदर्शन गर्न सक्थ्यो । उनी हुँदा जित अझै सहज हुन्थ्यो ।’

सिजनको सुरुवातमा बार्सिलोनाका विश्व कीर्तिमानी रकममा पिएसजी पुगेका नेयमार रियल म्याड्रिड जान सक्ने चर्चा पनि व्यापक रुपमा चलेको छ । यद्दपी नेयमार मैदान फर्केर विश्व कपमा केन्द्रित हुन चाहिरहेका छन् ।