लन्डन (एजेन्सी) – जर्मन राष्ट्रिय टोली एवं आर्सनल मिडफिल्डर मेसुट ओजिल हाल घाइते भएपनि विश्वकपका लागि फिट हुने खेलाडी आफैंले बताएका छन्  । ढाडको समस्याले प्रिमियर लिगका बाँकी खेलमा उपस्थित नहुने पक्का भएपछि ओजिल्ले आफु विश्वकपका लागि भने तयार रहने बताएका हुन् ।

ओजिलले आइतबार भएको बर्नलीविरुद्धको प्रिमियर लिग खेल गुमाएका थिए । उक्त खेलपश्चात प्रशिक्षक आर्सेन वेंगरले ओजिलले सिजनका बाँकी खेलमा उपस्थिति नजनाउने पक्का गरेका हुन् । उनको यस खबरले जर्मन मिडियामा भने विश्वकप संकटमा पर्नेजस्ता खबर पनि आएका थिए । उनले ट्वीटरमार्फत लेख्दै विश्वकपसम्म ठिक हुने बताएका छन् ।

‘ ढाडको चोटका कारण मैले बर्नलीसँगको खेल गुमाउनु पर्यो । पुरै ठिक हुन अझै केहि समय लाग्ने छ । तर म विश्वकपका लागि पूर्णरुपमा फिट हुनेमा विश्वस्त छु,’ उनले बताए । विश्वकपको पछिल्लो संस्करणमा जर्मनीले उपाधि जित्दा ओजिल टोलीका महत्त्वपूर्ण खेलाडी थिए ।

यसपटक पनि जर्मनीलाई उपाधिको दावेदारको रुपमा हेरिएको छ । गत वर्ष युवा खेलाडीकै भरमा जर्मनीले फिफा कन्फेडेरेसन कपको उपाधि जितेको थियो । सिनियर खेलाडीलाई विश्राम दिएको उक्त प्रतियोगितामा युवा टोलीले उत्कृष्ट प्रदर्शन गरेका थिए । यसपटक टोनी क्रुस, लेरोय साने, म्याट्स हमल्स, लगायतका खेलाडी क्लबका लागि राम्रो प्रदर्शन गरिरहेका हुनाले पनि जर्मनीले राम्रो प्रदर्शन गर्ने अपेक्षा गर्न सकिन्छ ।