काठमाडौं (हाम्रो खेलकुद) – पश्चिमाञ्चल भलिबल टोलीलाई ३-० को सोझो सेटमा पराजित गर्दै नेपाल पुलिस क्लब चौथो केएनपी राष्ट्रिय महिला भलिबल प्रतियोगिताको फाइनलमा प्रवेश गरेको छ। 

तस्बिर: विवेक सुवेदी/ हाम्रो खेलकुद

सोमबार त्रिपुरेश्वोर स्थित राष्ट्रिय खेलकुद परिषदको कभर्डहलमा सम्पन्न दोस्रो सेमिफाइनलमा पुलिसले २५-१९,२५-१५ र २५-२२ ले पश्चिमाञ्चललाई पराजित गरेको हो। नेपाल पुलिस क्लबले फाइनलमा भोली नेपाल एपिएफको सामना गर्नेछ। फाइनल १:३० बजे हुनेछ। त्यस्तै पश्चिमाञ्चलले तेस्रो स्थानको खेलमा भोली १० बजे शिवम् न्यु डायमण्डको सामना गर्नेछ। न्यु डायमण्डलाई पहिलो सेमिफाइनलमा एपिएफले ३-१ ले पराजित गरेको थियो।

नेपाल पुलिस क्लबले समूह चरणको खेलमा शिवम् न्यु डायमण्डलाई र नेपाल आर्मीलाई ३-१ ले पराजित गर्दै समूह विजेताको रुपमा सेमिफाइनलमा स्थान बनाएको थियो भने पश्चिमाञ्चल समूह ‘ए’को उपविजेता हो। पहिलो खेलमा एपिएफसँग सोझो सेटमा पराजित भएको पश्चिमाञ्चलले दोस्रो खेलमा जावलाखेल भलिबल प्रशिक्षण केन्द्रलाई सोझो सेटमा पराजित गरेको थियो।

तीन विभागीय टोलीसहित न्यु डायमण्ड एकेडेमी, पश्चिमाञ्चल भलिबल टोली र जावलाखेल भलिबल प्रशिक्षण केन्द्रको सहभागिता रहेको यस प्रतियोगिताको फाइनल बैशाख २५ गते हुनेछ।

प्रतियोगितामा उत्कृष्ट प्रदर्शन गर्ने खेलाडीलाई ‘केएनपी सर्वोकृष्ट खेलाडी’ को उपाधि सहित १० हजार रुपैयाँ प्रदान गरिनेछ । विधागत उत्कृष्टतर्फ ‘शिवम् सिमेन्ट वेष्ट स्पाईकर’, ‘शिवम् सिमेन्ट वेष्ट डिफेन्स’ र ‘शिवम् सिमेन्ट वेष्ट ब्लकर’ को उपाधिबाट एक–एक खेलाडीलाई ५ हजार रुपैयाँसहित पुरस्कृत गरिनेछ ।

प्रतियोगिताको विजेताले १ लाख ५० हजार, उपविजेताले १ लाख र तेस्रो हुने टोलीले ५० हजार पुरस्कार पाउनेछन्। त्यस्तै उत्कृष्ट खेलाडीले १० हजार र विधागततर्फ उत्कृष्ट ७ जनाले जनही ५ हजार पुरस्कार पाउनेछन्। प्रतियोगिताको वजेट १८ लाख रहेको छ।