बार्सिलोना (एजेन्सी) – यस सिजनको अन्तिम एल कासिकोमा आज बार्सिलोनाको घरेलु मैदानमा रियल म्याड्रिड भिड्दैछ । स्पेनिस फुटबलको बहुप्रतिक्षित खेल एल क्लासिकोमा धेरैको नजर रियलका फरवार्ड क्रिस्टियानो रोनाल्डो र बार्सिलोनाका लियोनल मेस्सीमा हुनेछ । 

विश्व फुटबलका दुई स्टार रोनाल्डो र मेस्सीले फुटबलको धेरै जसो कीर्तिमान एकअर्काबीच राखेका छन् । यस युगकै उत्कृष्ट फुटबलरको रुपमा दुवै खेलाडी चिनिन्छन । आज राती नेपाली समयानुसार १२:३० मा सुरु हुने एलक्लासिकोमा ३३ वर्षीय पोर्चुगेली फरवार्ड रोनाल्डो र ३० वर्षीय अर्जेन्टिनी स्ट्राइकर मेस्सी आमने-सामने हुँदैछन्।

एल क्लासिकोमा दुई खेलाडीको आँकडा कस्तो छ ?

कसले जितेका छन् धेरै खेल ?

एल क्लासिकोमा अहिलेसम्म दुई खेलाडीको सहभागिता हेर्दा क्रिस्टियानो रोनाल्डो भन्दा लियोनल मेस्सीले धेरै खेल जितेका छन् । मेस्सीले ३९ एल क्लासिकोमा १७ मा जित र १२ मा हार बेहोरेका छन् । रोनाल्डोले भने २९ खेलमा ८ मा मात्र जित हासिल गरेका छन्, १४ खेलमा पराजय भोगेका छन् ।

कसले गरेको छ एल क्लासिकोमा धेरै गोल ?

दुई खेलाडीलाई हेर्ने हो भने एल क्लासिकोमा रोनाल्डोभन्दा मेस्सीले धेरै गोल गरेका छन् । रोनाल्डोले २९ खेलमा १७ गोल गरेका छन् भने मेस्सीले ३७ खेलमा २५ गोल गरेका छन् ।

कसको नाममा धेरै असिस्ट ?

एल क्लासिकोमा तथ्याङ्क हेर्ने हो भने मेस्सी रोनाल्डो भन्दा धेरै अगाडि छन् । रोनाल्डोले २९ खेलमा १ गोलमा मात्र सहयोग गरेका छन् भने मेस्सीले ३७ खेलमा १४ असिस्ट गरेका छन् ।

गोल डट कमको तथ्याङ्कमा आधारित