म्याड्रिड (एजेन्सी) – इंग्लिस क्लब आर्सनललाई समग्रमा २-१ ले पराजित गर्दै स्पेनिस टोली एटलेटिको म्याड्रिड युरोपा लिगको फाइनलमा पुगेको छ । बिहीबार एटलेटिकोले घरेलु मैदानमा भएको दोस्रो लेगमा १-० को जित दर्ता गर्दै उपाधि भिडन्तको लागि स्थान पक्का गरेको हो । गत साता भएको पहिलो लेग १-१ को बराबरीमा सकिएको थियो ।

चेल्सीका पूर्व-खेलाडी डिएगो कोस्टाले पहिलो हाफको अन्त्यतिर गरेको गोल नै निर्णायक सावित भयो । एन्टोइन ग्रिज्मनको पासमा कोस्टाले कठिन एंगलबाट प्रहार गरेको सट गोलमा परिणत भएको थियो । आर्सनलले खेल अवधिभर गोलमा जम्मा एकपटक प्रहार गर्यो । तुलनात्मक रुपमा औसत भन्दा तलको प्रदर्शन गरेको आर्सनलले छाड्न लागेका प्रशिक्षक आर्सेन वेंगरलाई सुखद बिदाइ दिन सकेन ।

यस पराजयसँगै आर्सनलले लगातार दुई सिजन च्याम्पियन्स लिग फुटबल नखेल्ने पक्का भएको छ । वेंगरले यसअघि आर्सनलमा सुखद बिदाइ लिने बताउँदै आएका थिए । तर आर्सनलका लागि २ सय ५० औं युरोपियन खेलको जिम्मेवारी लिइरहेका वेंगरले फाइनलसम्म पुर्याउन असमर्थ रहे । आर्सनलको हारमा डिफेन्डर लौरेन्ट कोसिएल्नीको चोटले थप पिडा दिएको छ ।

अर्को सेमिफाइनल खेलमा फ्रान्सेली क्लब मार्सेले अस्ट्रियाको साल्जबर्गलाई इन्ज्युरी समयको गोलको मदतले पराजित गर्यो । खेलको १ सय १६ औं मिनेटमा पोर्चुगलका डिफेन्डर रोलान्डोले गोल गर्दै टोलीलाई फाइनलसम्म पुर्याएका थिए । समग्रमा मार्से ३-२ ले विजयी हुँदै उपाधि भिडन्तमा स्थान बनाउन सफल रहयो ।