अध्यक्षका उमेदवार कुँवर भन्छन्ः निर्वाचन २२ गते नै किन ?

काठमाडौं (हाम्रो खेलकुद) – अखिल नेपाल फुटबल संघ (एन्फा) का अध्यक्ष पदका प्रत्यासी सस्थापन पक्षका मणि कुँवरले २२ बैशाखको लागि तय भएको एन्फाको चुनावी साधारणसभा कुनै पनि हालतमा मान्य नहुने बताएको छ ।

पटक–पटक सरेको एन्फाको चुनावी साधारणसभा नजिकिदै गर्दा अध्यक्षका प्रत्यासीबाट यस्तो खालको प्रतिक्रिया आएपछि आसन्न २२ बैशाखलाई तय भएको एन्फाको चुनावी साधारणसभा थप अन्योलता बढेको छ । एन्फाका वरिष्ठ उपाध्यक्षसमेत रहेका मणि कुँवरले मंगलबार राजधानीमा पत्रकार सम्मेलको आयोजना गर्दै २२ बैशाखमा हुन लागेको चुनाव एन्फाको विधि र विधानसम्मत् नभएको भन्दै चुनाव आफूहरुलाई मान्य नहुने बताएको हो । उनले पटकपटक सरेको चुनाव षड्यन्त्रपूर्वक गरिन लागेको आरोप समेत लगाए । ‘हामीले एन्फाको चुनाव रोक्न खोजेका हैनौ । चुनाव विधिसम्मत र एन्फाको विधान अनुरुप मात्रै हुनुपर्छ भन्न खोजेका हौं ।’ अध्यक्षका प्रत्यासी कुँवरले भने, ‘एन्फाको कार्यसमितिमा म आँफै छु । विधि र विधान विपरित चुनाव हुन लागेको म आफैले पत्रपत्रिका हेरेर थाहा पाउनुपर्ने ? यो सरार षड्यन्त्रमुलक रुपमा हुन लागेको हो । त्यसैले २२ बैशाखको निर्वाचन हाम्रो लाग कुनै पनि हालतमा मान्य हुने छैन ।’ एन्फाको विधि र विधान अनुरुप एन्फाको निर्वाचन नहुने हो भने २२ गते नै किन ? २१ गते छ, २३ गते पनि थियो । उनले प्रति प्रश्न गरे । एन्फा निर्वाचनबारे उच्च अदालत पाटनले यसअघि दिएको अन्तरिम आदेश वैशाख १२ मा खारेज गरेपछि स्थगित भएको निर्वाचन वैशाख २२ गते हुने मिति तय भएको थियो ।

‘हामीले निर्वाचन समितिमा अपिल गरेका छौं । अदालतमा मुद्दा परेपछि कार्यसमितिले पहिले गरेको निर्णय बे्रक भएको र विधानअनुसार फेरि कार्यकारी समितिले ६० दिने नोटिस जारी गर्नुपर्ने कुँवर पक्षको माग छ । उनले निर्वाचनमा जसले जितेपनि फुटबलले नै जित्नुपर्ने बताउदै कुनै पनि स्थितिमा चुनाव गराउने षड्यन्त्र भए यो नेपाली फुटबलको लागि राम्रो नहुने बताए । ‘सहमति र विधान सम्मत नभएका कारण मात्रै हामीले आपत्ति जनाएका हौं । हामी नेपाली फुटबललाई निलम्वन र फुटबललाई ठप्प पार्न पक्षमा छैनौ ।’ कुँवरले भने, ‘यस विषयमा हामीले ९ गते निर्वाचन समिति र दुई पक्षबीच छलफ पनि ग¥यौं । उनीहरुले २२ गतेलाई नै अडान लिएपछि म बाहिरिएको हुँ । यो निर्वाचनलाई म कुनै पनि हालतमा मान्दिन ।’

कुँवरले पत्रकार सम्मेलनमा एन्फाको विधान राष्ट्रिय खेलकुद परिषद् (राखेप) ले अहिलेसम्म पारित नगरेको आरोप लगाए । ‘राष्ट्रिय खेलकुद परिषद्को संघ संस्था ऐनअन्तर्गत कुनैपनि संघ संस्थाको विधान राष्ट्रिय खेलकुद परिषद्बाट स्वीकृत हुनुपर्छ भनेर प्रष्ट छ ।’ कुँवरले भने, ‘राष्ट्रिय खेलकुद परिषद्ले सबै संघसंस्थालाई स्वतन्त्र दिएर विधान स्वीकृति नगर्नु पर्ने नयाँ नियम निकालेको छ भने मलाई जानकारी छैन । एन्फाको बारेमा मलाई जानकारी आएसम्म अहिलेसम्म विधान पास भएको छैन ।’

कुँवरले पत्रकार सम्मेलनमा यसो भनिरहँदा राष्ट्रिय खेलकुद परिषद्को मिति २०७४ फाुगन १८ गतेको निर्णयले एन्फाले पठाएको संशोधित विधान पारित गरेको देखाएको छ । राखेपअन्तर्गत संघसंस्था समन्वय विभाग प्रमुख डेम बहादुर बस्नेतले एन्फाको संशोधित विधान पास गरेर पठाइसकेको छ ।

यता, परिवर्तन पक्षधरबाट अध्यक्षका प्रत्यासी कर्मा छिरिङ शेर्पाले एन्फाको निर्वाचन २२ बैशाखमै हुने दावी गरे । ‘अब एन्फाको निर्वाचन रोक्नुपर्ने कुनै कारण नै छैन । अदालतको विषय पार लागेको छ । राष्ट्रिय खेलकुद परिषदबाट पनि विधान पास भएको अवस्था छ ।’ कर्माले भने, ‘सबै प्रक्रिया पूरा हुदा एन्फाको चुनाव रोकिनु पर्ने कुनै कारण देख्दिन । असहमतिको कुरा छ भने साधारण सभा राख्नुपर्छ । हार्ने डरले कुनै पनि बहान बनाउनु हुदैन ।’

भक्तपुर जिल्ला फुटबल संघका तत्कालिन अध्यक्ष गौतम सुजुख र मकवानपुर जिल्ला फुटबल संघका तत्कालिन उपाध्यक्ष मनिष श्रेष्ठले आफ्नो जिल्लामा निर्वाचन नभएकाले केन्द्रीय कार्यसमितिको निर्वाचन हुँदा आफ्नो प्रतिनिधित्व नभएको भन्दै मुद्दा दर्ता गराएपछि उच्च अदालत पाटनका न्यायाधीश राजकुमार वनको एकल इजलासले निर्वाचन नगराउन उच्च अदालत पाटनले गत चैत ७ गते एन्फाको १६ औं साधारणसभा तथा कार्यसमिति निर्वाचन नगर्न अन्तरिम आदेश दिएपछि गत वर्ष चैत १४ गते तय भएको निर्वाचन स्थगित भएको थियो ।