इलाम(हाम्रो खेलकुद)-  अघिल्लो सिजनको दोस्रो सर्वाधिक सफल टोली रुस्लान थ्री स्टार क्लबले बर्षको पहिलो उपाधिको रुपमा माईभ्याली गोल्डकप फुटबल प्रतियोगिताको उपाधि जितेको छ ।

इलामको ठुलो टुडिखेल मैदानमा सोमबार भएको प्रतिस्पर्धात्मक खेलमा चिरपरिचित प्रतिद्धन्द्धी लक्ष्मी हुण्डाई मनाङ–मस्र्याङ्दी क्लबलाई अतिरिक्त समयमा १–० ले पराजित गर्दै थ्री स्टारले सिजनको पहिलो उपाधि जितेको हो ।

थ्री स्टारलाई सिजनको पहिलो उपाधि दिलाउन सुनिल बलले निर्णायक गोल गरे । निर्धारित समयमा कुनै गोल हुन नसकेपछि खेल अतिरक्त समयमा धकेलिएको थियो । अतिरिक्त समयको चौथो मिनेटमा नै सुनिल बलले गोल गरेपछि थ्री स्टारले खेलमा अग्रता बनाएको थियो । अन्तत सुनिलको गोल नै थ्री स्टारलाई च्याम्पियन बनाउन पर्याप्त बन्यो ।

यससँगै थ्री स्टारले मनाङमाथिको पछिल्लो सबै ६ भेटमा पराजित गर्न सफल बन्यो । त्यसमध्ये  फाइनलमा पराजित गरेको यो तेस्रो पटक हो । थ्री स्टारले चैतमा बुटवलमा भएको मदन भण्डारी गोल्डकपमा र त्यसअघि इटहरी गोल्डकपको  फाइनलमा   मनाङलाई नै पराजित गर्दै च्याम्पियन बनेको थियो ।

थ्री स्टारले मनाङलाई मदन भण्डारी इटहरी गोल्ड कप र बुटबलको मदन भण्डारी गोल्ड कप दुवैको फाइनलमा हराएको थियो । विराट गोल्ड कपको क्वार्टरफाइनल, तिलोत्तमा गोल्डकप र चितवनको विकास रनिङ शिल्डको सेमिफाइनलमा पनि थ्री स्टारले मनाङलाई पराजित गरेको थियो ।

उपाधिसँगै थ्री स्टारले ६ लाख ६६ हजार ६ सय ६६ हजार प्राप्त गर्यो । दोस्रो स्थानमा चित्त बुझाएको मनाङले ४ लाख रुपैया प्राप्त गर्यो । मनाङका कप्तान विराज महर्जन प्रतियोगिताको सर्वोकृष्ट खेलाडी घोषित हुदै एक थान स्कुटी प्राप्त गरे । बैशाख ८ गतेबाट शुरु भएको प्रतियोगितामा विभिन्न १२ वटा टीमले सहभागिता जनाएका थिए ।