बार्सिलोना (एजेन्सी) – अर्जेन्टिनी फरवार्ड लिओनेल मेस्सीको ह्याट्रिकसँगै डेपोर्टीभोलाई हराएको बार्सिलोनाले आइतबर सिजनको ला लिगा उपाधि पक्का गर्यो । क्याटलान क्लबको २५ औं लिग उपाधि पक्का भएसँगै क्लबले उपाधि जितमा संलग्न खेलाडीको नाम समेटेर टि-सर्ट तयार पारेको थियो ।

खेल सकिएलगत्तै बार्सिलोनाको लिग उपाधि पक्का भएपछि सबै खेलाडीले उक्त टि-सर्ट लगाएर जितको खुसी मनाएका थिए । क्लबका खेलाडीले सामाजिक संजालमा तस्बिर राख्दै समर्थकमाझ लिग उपाधिको उत्साह साटासाट पनि गरे । तर लिगमा खेलेका केहि खेलाडीको नाम भने बार्सिलोनाले टि-सर्ट राख्न भुलेको छ ।

सिजनको पहिलो हाफ बार्सिलोनामा बिताएका विंगर जेरार्ड डेउलोफेउले आफ्नो नाम उक्त टि-सर्टमा नभएकोमा निराशा व्यक्त गरेका छन् । फिलिपे कोउटिन्होको आगमनपछि क्लबले उनलाई वाटफर्ड लोनमा पठाएको थियो । त्यसअघि उनले बार्सिलोनाका लागि लिगमा १० खेल खेलेका थिए । यद्यपि उक्त टि-सर्टमा बार्सिलोनाको लागि कुनै खेल नखेली इन्टर मिलान पुगेका राफिन्हाको नाम भने समावेश छ ।

नाम समावेश नगरेकोमा डेउलोफेउले ट्वीटरमा लेख्दै भनेका छन् , ‘लिगको उपाधि विजेता । के मेरो पनि उपाधि हैन?’ । उनले उक्त ट्वीटमा बार्सिलोनालाई पनि ट्याग गरेका छन् । टि-सर्टमा डेउलोफेउसँगै जाभिएर मासेरानो र आर्डा टुरानको नाम पनि लेखिएको छैन । दुवै खेलाडी विगतका सिजनमा मुख्य हतियार थिए भने पहिलो हाफमा केहि खेलमा समावेश भएका थिए ।