बार्सिलोना (एजेन्सी) – स्टार फरवार्ड लिओनेल मेसीको ह्याट्रिकको मदतले डेपोर्टिभोलाई ४-२ ले पराजित गर्दै बार्सिलोनाले २५ औं पटक स्पेनिस ला लिगाको उपाधि जितेको छ । मेस्सीको तीनओटै गोलमा अर्का फरवार्ड लुइस सुआरेजले पास उपलब्ध गराएका थिए ।

खेलको सातौं मिनेटमा बार्सिलोनाले फिलिपे कोउटिन्होको गोलमा अग्रता लिएको थियो । ३८ औं मिनेटमा मेस्सिले बार्सिलोनाको अग्रता दोब्बर पारे । उनले सुआरेजको पासलाई उत्कृष्ट भली प्रहार गर्दै गोलमा परिणत गरेका थिए । त्यसको दुई मिनेटमा लुकास पेरेजले डेपोर्टिभोको लागि गोल फर्काए ।पहिलो हाफमा २-१ ले अगाडी रहेको बार्सिलोनाले दोस्रो हाफमा भने सुरुआतमै गोल खान पुग्यो ।

दोस्रो हाफको ६४ औं मिनेटमा एम्रे कोलाकले गोल गर्दै खेल बराबरीमा ल्याए । उनले सेल्सो बोर्जेसको पासमा गोल गर्दै घरेलु टोलीलाई खेलमा फर्काएका थिए । मेस्सीले ८२ औं मिनेटमा सुआरेजसँग वन-टु पास खेल्दै गोल गरेपछि बार्सिलोनाले अग्रता लियो । त्यसको तीन मिनेटपछि सुआरेजकै पासमा गोल गर्दै मेस्सीले बार्सिलोनाको जित सुनिश्चित गरे ।

मेस्सीले ह्याट्रिकसँगै जारी सिजनको लिग गोल संख्या ३२ पुर्याएका छन् । उनले युरोपमा सर्वाधिक गोल गर्ने सुचिमा मोहमद सलाहलाई १ गोलले पछाडी पारे । यससँगै ला लिगमा लगातार ७ सिजन ३० भन्दा बढी गोल गर्ने मेस्सी पहिलो खेलाडी पनि बने । जारी सिजन बार्सिलोनाको उपाधि दौडमा मेस्सीको प्रदर्शन नै लिग उपाधि छिनोफानोमा निर्णायक रहयो ।