म्याड्रिड (एजेन्सी) – स्पेनिस महारथी क्लब रियल म्याड्रिडले स्पेनिस ला लिगाअन्तर्गत शनिबार लेगानेसलाई २-१ ले पराजित गरेको छ । मंगलबार हुने च्याम्पियन्स लिग सेमिफाइनलको दोस्रो लेग्का लागि मुख्य खेलाडीलाई विश्राम दिएको रियलले जित दर्ता गर्न निकै मिहिनेत गर्नुपरेको थियो ।

पहिलो हाफमा २-० को अग्रता लिएको रियलले दोस्रो हाफमा भने गोल थप्न सकेन । घरेलु मैदान सान्टियागो बर्नाबाउमा ग्यारेथ बेलले रियललाई अग्रता दिलाएका थिए । खेलको आठौं मिनेटमा ग्यारेथ बेलले भलीमार्फत गोल गरे । पहिलो हाफको अन्त्यतिर रियलका लागि युवा खेलाडी बोर्जा मायोरलले अग्रता दोब्बर पारे । मायोरालले विपक्षी खेलाडीको गल्तिको फाइदा उठाउँदै सहजै गोल गरेका थिए ।

दोस्रो हाफमा लेगानेसले आफ्नो आक्रमणलाई थप बढावा दियो । फलस्वरुप डार्को ब्रासानाकले लेगानेसलाई खेलमा फर्काए । उनले नोर्डीन अम्राबाटको क्रसमा गोल गर्दै गोलअन्तर घटाएका थिए । खेलको बाँकी समयमा गोल गर्न नसकेपछि लेगानेस पराजित भयो । खेलको अन्तिम सिठी बजेपछि लेगानेसका कप्तान ग्याब्रिएलले रातो कार्ड पाएका थिए । रियलको क्षेत्रभित्र लेगानेसको खुट्टामा बल छँदै रेफ्रीले अन्तिम सिठी बजाएको कारण ग्याब्रिएलले रेफ्रीलाई दुर्व्यवहार गरेका थिए ।

रियलले मिडफिल्डर क्यासेमिरोलाई पहिलो रोजाइमा डिफेन्सको भूमिकामा खेलाएको थियो । युवा खेलाडीको बाहुल्यता रहेको टोलीमा करीम बेन्जेमा र बेलमात्र नियमित खेलाडी थिए । गोलरक्षक फ्रान्सिस्को कासिलाले पनि केहि राम्रो बचाऊ गरे ।

यस नतिजासँगै रियलले ३४ खेलमा ७१ अंक जोडेको छ । दोस्रो स्थानमा रहेको एटलेटिको म्याड्रिडको ३४ खेलमा ७२ अंक छ । शीर्षस्थानको बार्सिलोनाले भने एक खेल कम खेल्दै ८३ अंक बनाएको छ । अर्को खेल जितेको अवस्थामा लिग उपाधि बार्सिलोनाको नाममा पक्का हुनेछ । चौथो स्थानमा भ्यालेन्सिया ३४ खेलमा ६६ अंकसहित लगभग सुरक्षित देखिएको छ ।