इलाम (हाम्रो खेलकुद)– रुस्लान थ्री स्टार क्लब वर्षको पहिलो प्रतियोगिताको रुपमा रहेको इलाममा जारी चौथो माइभ्याली टुबोर्ग गोल्डकप फुटबल प्रतियोगिताको फाइनलमा पुर्याउन विमल घर्तीमगरको भूमिका महत्वपूर्ण रह्यो ।

थ्री स्टारले शनिबार एपिएफलाई २–० ले हराउँदा दुव गोलमा विमलको भूमिका रहेको थियो । पहिलो हाफको इन्जुरी समयको पहिलो मिनेटमा गोल गरेका विमलले अन्तिम मिनेटमा मार्टिन्सको गोलमा पास मिलाइदिएका थिए ।

राष्ट्रिय टोलीका स्ट्राइकर समेत रहेका विमल खेलको म्यान अफ दी म्याच घोषित भएका थिए । यसअघि क्वार्टरफाइनलमा थ्री स्टारले नेपाल पुलिस क्लबविरुद्ध टाइब्रेकरमा ४–३ ले हराएको थियो । निर्धारित समय १–१ बराबरीमा टुंगिएको खेलका टाइब्रेकरमा विमलले पनि गोल लगेका थिए ।

गत वर्ष विमल थ्री स्टारमा आबद्ध भएपनि पछि उनी आइ लिग टोली मोहन बगानमा पुगेका थिए ।  यद्दपी त्यहाँ उनले खासै मौका पाएनन् । सिजनको अन्त्यसँगै स्वदेश फर्केपछि विमल पुनः थ्री स्टारबाट खेल्न थालेका हुन् ।

माइभ्यालीमा थ्री स्टारले घरेलु फुटबलको अर्को चर्चित टोली लक्ष्मी हुन्डाई मनाङ मस्र्याङ्दीको सामना गर्नेछ । विजेताले ६ लाख ६६ हजार ६ सय ६६ रुपैयाँ प्राप्त गर्नेछ ।