मेलबर्न (एजेन्सी) – न्युकासल जेट्सका राइली मक्ग्रीले ए लिग अन्तर्गतको खेलमा मेलबर्न सिटीविरुद्ध उत्कृष्ट गोल गरेका छन् । अस्ट्रेलियन लिगअन्तर्गत शुक्रबार उनले पेनाल्टी क्षेत्रको ठिक भित्रबाट गरेको स्कोरपियन किक गोलमा परिणत भएपछि न्युकासल १-० पछि पारेको स्थितिबाट खेलमा फर्केको थियो ।

मक्ग्रीले खेलको ५७ औं मिनेटमा आफ्नै टोलीका खेलाडीसँग वन-टु पास खेलाडी फर्केर आएको पासमा गरेको प्रयास गोलमा परिणत भएको थियो । उनको साथीले दिएको पास उनीभन्दा केहि पछाडी आएपनि खुट्टाको पछाडिको भागले प्रहार गरेको बल गोलरक्षकलाई बिट गर्दै पोस्टभित्र छिरेको थियो । १९ वर्षीय मक्ग्रीको गोलको मदतले खेल बराबरीमा आएको थियो । खेलमा न्युकासल विजयी हुँदै ए लिगको ग्राण्ड फाइनलमा स्थान बनाउन सफल भएको छ ।

मक्ग्री आफैं पनि गोल देखेर आश्चर्यमा पारेको बताए । ‘मेरो भाग्य बलियो भएर होला त्यो बल गोल हुन पुग्यो । म अगाडी बढिरहेको थिएँ, बल नजिकै आएकोले मैले अरु केहि नसोची प्रहार गरें र गोल भयो । गोल भएपछि एकदम खुसी लाग्यो,’ उनले सुनाए । न्युकासलका लागि अर्को गोल जेसन हफम्यानले गरेका थिए । त्यसअघि ब्रुनो फोर्नारोलीको गोलमा मेलबर्नले पहिलो हाफमा अग्रता लिएको थियो ।

गत सिजन ओलिभिएर जिरुडले सोहि प्रकृतिको गोल गर्दै फिफा पुस्कास अवार्ड हात पारेका थिए । स्कोरपियन किक निकै दुर्लभ स्किल हो र यसमा गोल गर्नु निकै कठिन मानिन्छ । मक्ग्रीको उत्कृष्ट गोलले टोलीलाई फाइनलसम्म पुग्ने ढोका खोलेको हुनाले पनि उनको गोलले पुस्कास जित्न सक्ने सम्भावना बलियो छ । गत सिजन हेनरिक मिखीतार्यानले पनि स्कोरपियन किकमा गोल गरेका थिए ।

भिडियो यहाँ हेर्नुहोस: