बार्सिलोना (एजेन्सी) – बार्सिलोनाका कप्तान तथा मिडफिल्डर आन्द्रेस इनिएस्टाले सिजनको अन्त्यसँगै बार्सिलोना छाड्ने खुलासा गरेका छन् । उनले बार्सिलोना छाड्ने निर्णय लिएसँगै अब बार्सिलोनामा उनको स्थान कसले लिनेछ भन्ने चर्चा पनि सुरु भएको छ ।

इनिएस्टाका उत्तराधिकारीको रुपमा लिभरपुलबाट जनवरीमा आएका फिलिपे कोउटिन्होलाई हेरिंदै आएको छ । तर उनले आक्रामक जिम्मेवारीमा बढी ध्यान दिने हुनाले टोलीको क्रिएटिभ मिडफिल्ड सम्हाल्न बार्सिलोनाले यस सिजनको ट्रान्सफर विन्डोमा केहि खेलाडी भित्र्याउने सम्भावना प्रबल छ । यसका लागि बार्सिलोनाले मोटो रकम खर्चिनु पर्ने अवस्था सिर्जना भएको छ ।

इटालियन मिडफिल्डर मार्को भेराट्टी युरोपका उत्कृष्ट मिडफिल्डर मध्यका एक हुन् । २५ वर्षको उमेरमा विश्वस्तरीय खेलाडीको छवी बनाइसकेका भेराट्टी पेरिस सेन्ट जर्मेन (पीएसजी) बाट व्यवसायिक फुटबल खेल्दै आएका छन् । उनी कठिन अवस्थामा पनि बललाई होल्ड गर्न सक्ने, राम्रो पास गर्ने र भिजन भएका खेलाडीको रुपमा परिचित छन् ।

जारी लिग वन सिजनमा उनले औसत ९२.७ पास खेलेका छन् जसमा ९१.२ प्रतिशत सफलता प्राप्त भएको छ । प्रति खेल १.३ महत्त्वपूर्ण पास र १.९ ड्रीबल गर्दै उनले आफुलाई पीएसजीको क्रिएटिभ मिडफिल्डको मुख्य हतियारको रुपमा स्थापित गरेका छन् । उनले दुई सिजनयता पीएसजीका लागि ५ गोल र १२ असिस्टको योगदान पनि दिएका छन् ।

बार्सिलोनाले गत सिजनको ट्रान्सफर विन्डोमा पनि भेर्राट्टीलाई भित्र्याउने प्रयास गरेको थियो । पिएसजीए निकै ठूलो रकमको माग गरेपछि बार्सिलोनाको ध्यान कोउटिन्होतर्फ मोडिएको थियो । तर २५ वर्षको उमेरमा युरोपको शीर्ष लिगमा २ सय बढी खेल खेलिसकेका भेर्राट्टीलाई भित्र्याउने यसपटक बार्सिलोनाले जस्तोसुकै रकम तिर्ने बुझिएको छ ।