लन्डन (एजेन्सी) – युरोपा लिगको सेमिफाइनल अन्तर्गत बिहीबार एटलेटिको म्याड्रिडले आर्सनललाई १-१ को बराबरीमा रोकेको छ । घरेलु मैदानमा इमिरेट्स स्टेडियममा आर्सनलले अग्रता लिएपनि अन्तिम समयमा त्यसलाई बचाउन सकेन ।

प्रशिक्षक आर्सेन वेंगरको अन्तम युरोपियन खेलमा आर्सनल खेलको सुरुआतमै बलियो स्थितिमा थियो । दशौं मिनेटमा एटलेटिकोका डिफेन्डर सिमे भर्साल्को दोहोरो पहेंलो कार्ड खाँदै मैदान बाहिरीएपछि आर्सनललाई फाइदा पुग्यो । त्यसको केहि मिनेटमा रेफ्रीले एटलेटिकोका प्रशिक्षक डिएगो सिमिओनीलाई पनि दर्शकदिर्घामा पठाए । एक खेलाडी बढी हुनाको बावजुद आर्सनलले पहिलो हाफमा अग्रता लिन सकेन ।

दोस्रो हाफको ६१ औं मिनेटमा आर्सनलले एल्केजेन्डर लाकजेटको गोलमा अग्रता लियो । उनले ज्याक विलिसियरको क्रसलाई सदुपयोग गर्दै घरेलु टोलीलाई अग्रतामा राखे ।  खेल सकिन ८ मिनेट बाँकी रहँदा एटलेटिकोले बराबरी गोल फर्कायो । फ्रान्सेली फरवार्ड एन्टोइन ग्रिज्मनले गोल गर्दै पाहुना टोलीलाई दोस्रो लेग अगाडी बलियो स्थितमा पुर्याए ।

मे महिनामा फ्रान्सको लियोनमा हुने फाइनलमा पुग्न आर्सनलले एटलेटिकोको घरेलु मैदानमा गोल गर्नेपर्ने अवस्था छ । रक्षात्मक रुपमा कमजोर देखिएको आर्सनलले एटलेटिकोमा जित्न निकै मिहिनेत गर्नुपर्ने हुन्छ । अर्को सेमिफाइनलको पहिलो लेगमा फ्रान्सेली टोली मार्सेले घरेली मैदानमा अस्ट्रियाको साल्ज्बर्गलाई २-० ले हरायो ।