म्याड्रिड (एजेन्सी) – च्याम्पियन्स लिग सेमिफाइनल अन्तर्गत पहिलो लेगमा रियल म्याड्रिडले बायर्न म्युनिखको घरेलु मैदानमा २-१ को अग्रता लियो। सामान्यतया अवे खेलमा २-१ को अग्रतालाई निकै राम्रो नतिजा मानिन्छ। 

तर रियल म्याड्रिडको घरेलु मैदानको नतिजा हेर्नेहो भने बायर्नविरुद्ध रियलले ‘ट्रेन्ड’ तोड्न जरुरी छ। च्याम्पियन्स लिगकै सेमिफाइनलमा युभेन्टसको घरेलु मैदानमा ३-० को सहज अग्रता लिएपनि स्यान्टियागो बर्नेबाउमा भने ३-१ ले पराजित भएको थियो। युभेन्टसले रियलको घरेलु मैदानमा उत्कृष्ट पुनरागम गरेपनि रोनाल्डोले इन्जुरी समयमा पेनाल्टी समयमा गोल गर्दै खेललाई अतिरिक्त समयमा जान रोके।

यस सिजन रियलले घरेलु मैदानमा २६ खेल खेल्दा १४ मा मात्र जित हासिल गरेको छ। आफ्नै मैदानमा ५ खेलमा पराजित भएको रियलले ७ खेल बराबरी खेलेको छ। त्यो भन्दा राम्रो नतिजा रियलले अवे मैदानमा गरेको छ। तसर्थ यो सिजन रियललाई बर्नेबाउमा फापेको छैन। रियललाई आफ्नै घरमा यो सिजन बार्सिलोना, युभेन्टस, बेटिस, भिल्लारियल र लेगानेसले हराएका छन्।

बायर्नविरुद्ध पनि दोस्रो लेग घरेलु मैदानमै हुनेहुँदा रियलले यो ‘ट्रेन्ड’ लाई तोड्न जरुरी छ। अघिल्लोपटक बायर्न रियलको घरेलु मैदानमा आउँदा २-१ को अग्रतालाई पल्टाउँदै खेल बराबरीमा पुर्याएको थियो। यद्दपी रियलले उक्त खेल अतिरिक्त समयमा जितेको थियो।

बायर्नलाई मे १ मा बर्नेबाउ निम्त्याउँनु अघि रियलले घरेलु मैदानमा ला लिगा अन्तर्गत १५ औं स्थानमा रहेको लेगानेसको सामना गर्नेछ। च्याम्पियन्स लिगको खेलअघिको यो परिक्षामा उतिर्ण हुँदै रियलले मनोबल उच्च राख्ने लक्ष्य लिएको हुनेछ। च्याम्पियन्स लिगको खेल लगतै क्याम्प नाउमा रियल र बार्सिलोना भिड्नेछ।